🔆રક્ષાબહેન દવે ~ મીની ! મીની🔆 -

મીની ! મીની !

મીની ! મીની ! મ્યાઉં મ્યાઉં, આવ દૂધ પાઉં.

પપ્પા ગ્યા છે ઑફિસ, મીની ! મમ્મી ગઈ બજાર,
ભાઈ ગયો છે સ્કૂલ, દીદી દર્પણમાં મશગૂલ.
કોઈ જુએ ના મારી સામું, જે માગે તે આપું.
ઘોડા પરના ડબરા સઘળા કેમ ભરેલા રાખું ?
મેવા, મીઠાઈ, મોટા પાઉં, મીની ! મીની ! મ્યાઉં મ્યાઉં

ઘીની બરણી આજ ભૂલી ગઈ મમ્મી પિંજરમાં,
દહીંની મટકી આંબી ગઈ હું છોને શીંકામાં,
પપ્પાનાં છે થોથાં મોટાં મૂકું ઉપરાઉપરી,
તો પણ મટકી આઘી રહે તો મૂકું મારી પોથી,
મેવા, મીઠાઈ, મોટા પાઉં, મીની ! મીની ! મ્યાઉં મ્યાઉં

પીપી ખાઉં, બિસ્કિટ ખાઉં, આવ તને પણ દઉં,
દૂધની ઝારી, ઘીની ઘારી, માખણ-મિસરી દઉં,
આપું તાજાં ખાજાં, આજે હું છું ઘરમાં રાજા –
-જાણી કાળો કાગો બોલે : કાઉ-કાઉ-કાઉ.
મેવા, મીઠાઈ, મોટા પાઉં, મીની ! મીની ! મ્યાઉં મ્યાઉં

~ રક્ષાબહેન દવે

રક્ષાબહેનની ઉંમર ન પૂછાય ! એના કાવ્યો આવાં જ સદાબહાર બાળક !