🔆કૃષ્ણ દવે ~ કેમ છે🔆

*સગાઈ*

કેમ છે, મજામાં છે ભાઈ?
સાંભળ્યું કે પાંપણની ઝળઝળિયાં સંગાથે હમણાં કરી તેં સગાઈ?
કેમ છે, મજામાં છે ભાઈ?

સારું,  કુટુંબ બહુ સારું, ને છોકરી તો એનાથી સારી,
જોજે ને આંખ તારી મ્હેક મ્હેક થાશે ને ભીંજાશે કીકીની ક્યારી,
ભીનાંછમ પગલાં એ પાડશે ને ત્યારે આ ઝાકળને લાગશે નવાઈ!
કેમ છે, મજામાં છે ભાઈ?

ભાગ્યશાળી હોય ને, એના નસીબમાં જ નીકળે છે ભાઈ આવું લેણું,
બાકી તો આંસુનું આખ્ખુંયે ખાનદાન એટલે કે મોંઘુ ઘરેણું!
અમથું કૈં અંદરથી છલકી છલકીને કોઈ આપે છે તમને વધાઈ?
કેમ છે, મજામાં છે ભાઈ?

નાના હતા ને ત્યારે આંસુને ઘેર અમે જાતા ને ખુબ ગીત ગાતા,
કારણને કાંઠા પણ ઉતારી એય એમાં ધુબ્બાકા મારતા ને ન્હા’તા,
હમણાં હમણાંથી એ તો મોટા થયા ને જરા એમાં આ ભીંતો ચણાઈ!
કેમ છે, મજામાં છે ભાઈ?

~ કૃષ્ણ દવે

સામાન્ય રીતે ‘સગાઈ’ શબ્દ સાંભળતા જ મનમાં શરણાઈના સૂર અને આનંદનો ઉત્સવ રેલાય, પણ અહીં કવિએ ‘આંસુ’ (ઝળઝળિયાં) સાથેની સગાઈની વાત કરીને દુઃખ કે વેદનાને એક નવો જ ગૌરવવંતો આયામ આપ્યો છે.

​કવિતાની શરૂઆત જ એક આત્મીય પ્રશ્નથી થાય છે: “કેમ છે, મજામાં છે ભાઈ?” અહીં કવિ સામેની વ્યક્તિની પીડાને નકારવાને બદલે સ્વીકારે છે. ઝળઝળિયાં સાથે સગાઈ થવી એટલે કે સતત આંખમાં આંસુ રહેવા, એ વાતને કવિ એક સંબંધનું નામ આપી દે છે. વેદના અહીં ભાર નથી, પણ એક સાથી છે.

​કવિતામાં કવિએ આંસુને એક સુંદર કન્યા (છોકરી) તરીકે કલ્પી છે.
આંસુનું કુટુંબ એટલે કે હૃદયના ભાવો. આંસુ માત્ર ખારા પાણીના ટીપાં નથી, પણ એ તો આંખની કીકીની ક્યારીને ભીંજવનાર અને મહેકાવનાર તત્વ છે. જ્યારે આ ઝળઝળિયાં આંખમાંથી બહાર આવે છે, ત્યારે ઝાકળને પણ ઈર્ષ્યા થાય તેવી તેની પવિત્રતા છે

​કવિ કહે છે કે જેને રડતા આવડે છે એ નસીબદાર છે. જેની અંદર લાગણીઓ જીવતી હોય તેને જ આંસુ આવે. દુનિયામાં રડવું એ નબળાઈ ગણાય છે, પણ કવિ તેને ‘મોંઘુ ઘરેણું’ કહીને એક ઉચ્ચ દરજ્જો આપે છે. આંસુ એ અંદરથી મળતી એક પ્રકારની વધાઈ છે કે તમારી અંદર હજી સંવેદના જીવંત છે.

માણસે પોતાની પીડાથી ભાગવાની જરૂર નથી. આંસુ એ તો આત્માનું શુદ્ધિકરણ છે. આ કવિતા રડતા માણસને આશ્વાસન નથી આપતી, પણ તેને તેના આંસુ પર ગર્વ કરતા શીખવે છે. ~ કિશોર બારોટ

કવિ કિશોર બારોટનું ‘કાવ્યવિશ્વ ટીમ’માં સ્વાગત છે.

ઉનાના વતની કવિ કિશોરભાઈએ શિક્ષક તરીકેનો અતિ ઉમદા કારકિર્દી પૂરી કરી છે. એમની કવિતાઓ લોકપ્રિય છે અને મને પણ પ્રિય છે.

“સવાર સવારમાં એક સરસ મજાની કવિતા મળે જાય તો દિવસ સુગંધી સુગંધી” આમ કહેતા કવિતાના મરમી કિશોરભાઈના કાવ્યસંગ્રહનું નામ પણ જુઓ, ‘આઠે પહોર આનંદ’ !

વર્ષ 2019ના શ્રેષ્ઠ પુસ્તક તરીકે ‘આઠે પહોર આનંદ’ ને ‘કવિસંગત’ એવોર્ડ મળે એમાં કોઈ નવાઈ નથી.

અઢળક આનંદ કિશોરભાઇ ‘કાવ્યવિશ્વ’ને સાથ આપવા બદલ અને ઉત્કૃષ્ટ કવિતાઓ લખવા બદલ….