🔆ધીરુબહેન પટેલ ~ રસોડું એટલે🔆

રસોડું એટલે

આ રસોડું એટલે કંઈ
ફક્ત રાંધવાની જગ્યા નહીં
દવાની દુકાન પણ એ જ.
અમારી નાની મોટી બધી તકલીફોનો
ત્યાં તરત ઈલાજ થાય.

દાદીમા ફ૨માવે ને મા બનાવે.
અમે હા પાડીએ કે ના
અમારા મોંમાં ઠોંસવામાં આવે
એનો સ્વાદ એટલો ખરાબ હોય
અને વાસ તો એથીયે ભયંકર

પણ એટલું તો કબૂલ કરવું પડે,
અમે તરત સાજા થઈ જઈએ –
અરે, એટલા ઝટપટ
કે અમારે પાછું નિશાળે જવું જ પડે.

~ ધીરુબહેન પટેલ

સૌજન્ય : કાવ્યસંગ્રહ ‘કીચન પોએમ્સ’ ~ ધીરુબહેન પટેલ * પ્રકાશક : બુકપબ 2018
આ જ કાવ્યસંગ્રહ ધીરુબહેન અંગ્રેજીમાં પણ આપ્યો છે.
Kitchen Poems – Dhiruben Patel * Image Pub. 2005, 2nd ed 2017