🔆ધીરુબહેન પટેલ ~ ક્યારેક🔆

બુઢી બાઈ

ક્યારેક વિચાર આવે છે
મારા આયનામાં સદાય દેખાતી
આ બુઢી બાઈ કોણ છે?

એ કંઈ એવી સુંદર નથી
એના વાળ લગભગ સફેદ
ચહેરો ઝંખવાયેલો
અને એના પર પથરાયેલી અપાર શાંતિ
જોવાનું મને સારું લાગે છે.

એની થાકેલી આંખોમાં
હોય છે હંમેશાં એક વત્સલ આવકાર
અને નાનું રમતિયાળ સ્મિત

ક્યારેય કશો ઠપકો નહીં
પ્રશ્નો નહીં, અપેક્ષા નહીં, આકાંક્ષા નહીં

શું કરતી હશે એ ત્યાં એકલી બેઠી બેઠી ?
એને કંટાળો નહીં આવતો હોય?

હું તો ક્યારેક જ એની પાસે જાઉં
એનુંયે એને દુઃખ નથી, નથી કશી ફરિયાદ
ક્યારેય એ મને નિરાશ નથી કરતી.
હોય છે – ત્યાં ને ત્યાં જ.
એનું આ હંમેશાં હાજર હોવું
કેવી અકળ વાત છે!

કેવી અકળ અને આનંદદાયક!
પણ એ બોલતી નથી
કશું કહેતી નથી
મારું કુતૂહલ શમાવવાની જરૂ૨ એ જોતી નથી.

ભલે, એમ તો એમ!
પણ મને એ ગમે છે
મૈત્રીનો સંબંધ ભલે ન હોય
એનું હોવું – હંમેશાં હાજર હોવું
મને ખૂબ સારું લાગે છે…

~ ધીરુબહેન પટેલ

ક્યારેક મૃત્યુનો ઓછાયો મન પર પડતો જ હોય છે. જુઓ આ એમનું કાવ્ય !

કાવ્યસંગ્રહ ‘છોળ અને છાલક’ * ધીરુબહેન પટેલ * ઈમેજ પ્રકાશન 2014