🔆ઝવેરચંદ મેઘાણી ~ થનગાટ * હાર્દિક ચૌહાણ🔆

મોર બની થનગાટ કરે, મન મોર બની થનગાટ કરે
ઘનઘોર ઝરે ચહું ઓર મારું મન મોર બની થનગાટ કરે

બહુ રંગ ઉમંગનાં પીંછ પસારીને
બાદલસું નિજ નેનન ધારીને, મેઘમલાર ઉચારીને
આકુલ પ્રાણ કોને કલસાદ કરે, મન મોર બની થનગાટ કરે

ઘર ઘરર ઘરર મેઘઘટા ગગને ગગને ગરજાટ ભરે
ગુમરી ગુમરી ગરજાટ ભરે નવ ધાન ભરી સારી સીમ ઝૂલે
નદીયું નવજોબન ભાન ભૂલે નવ દીન કપોતની પાંખ ખૂલે
મધરા મધરા મલકાઈને મેંડક મેહસું નેહસું બાત કરે
ગગને ગગને ઘૂમરાઈને પાગલ મેઘઘટા ગરજાટ ભરે
મન મોર બની થનગાટ કરે

નવ મેઘ તણે નીલ આંજણીએ મારાં ઘેઘૂર નેન ઝગાટ કરે
મારાં લોચનમાં મદઘેન ભરે વનછાંય તળે હરિયાળી પરે
મારો આતમ લહેર બિછાત કરે સચરાચર શ્યામલ ભાત ધરે
મારો પ્રાણ કરી પુલકાટ ગયો પથરાઈ સારી વનરાઈ પરે
ઓ રે મેઘ આષાઢીલો આજ મારે દોય નેન નીલાંજન ઘેન ભરે
મન મોર બની થનગાટ કરે

ઓલી કોણ કરી લટ મોકળીયું ખડી આભ મહોલ અટારી પરે
ઊંચી મેઘ મહોલ અટારી પરે અને ચાકમચૂર બે ઉર પરે
પચરંગીન બાદલ પાલવડે કરી આડશ કોણ ઊભેલ અરે
ઓલી વીજ કેરે અંજવાસ નવેસર રાસ લેવા અંકલાશ ચડે
ઓલી કોણ પયોધર સંઘરતી વિખરેલ લટે ખડી મે’લ પરે
મન મોર બની થનગાટ કરે

નદી તીર કેરાં કૂણાં ઘાસ પરે પનિહારી એ કોણ વિચાર કરે
પટકૂળ નવે પાણી ઘાટ પરે એની સૂનમાં મીટ સમાઈ રહી
એની ગાગર નીર તણાઈ રહી એને ઘર જવા દરકાર નહિ
મુખ માલતી ફૂલની કૂંપળ ચાવતી કોણ બીજા કેરું ધ્યાન ધરે
પનિહારી નવે શણગાર નદી કેરે તીર ગંભીર વિચાર કરે
મન મોર બની થનગાટ કરે

ઓલી કોણ હિંડોળ ચગાવત એકલ ફૂલ બકુલની ડાળ પરે
ચકચૂર બની ફૂલ ડાળ પરે વિખરેલ અંબોડાના વાળ ઝૂલે
દિયે દેહ નીંડોળ ને ડાળ હલે શિર ઉપર ફૂલ ઝકોળ ઝરે
એની ઘાયલ દેહના છાયલ છેડલા આભ ઊડી ફરકાટ કરે
ઓલી કોણ ફંગોળ લગાવત એકલ ફૂલ બકુલની ડાળ પરે
મન મોર બની થનગાટ કરે

તમરાંને સ્વરે કાળી રાત ધ્રૂજે નવ બાદલને ઉર આગ બૂઝે
નદી પૂર જાણે વનરાજ ગુંજે હડૂડાટ કરી સારી સીમ ભરી
સરિતા અડી ગામની દેવડીએ ઘનઘોર ઝરે ચહું ઓર
મારું મન મોર બની થનગાટ કરે
મન મોર બની થનગાટ કરે
~ ઝવેરચંદ મેઘાણી

મેઘાણીનાં જોશીલાં ગાન અને ગુજરાતી સાહિત્યના ગરવા ખજાનાની ખેવના કરનાર, સોરઠના સાવજની બુલંદી જેના કંઠમાં છે એવો કાઠિયાવાડનો તરવરિયો જુવાન, હાર્દિક ચૌહાણ. સોશ્યલ મીડિયા પર સવાર-સાંજ ઘૂમનારા લોકો એને જાણે છે. મારી પેઢીના લોકો કદાચ….

જર્મનીમાં વસતો અને જર્મનીના લોકોને આ કાઠિયાવાડી ગીતો શીખવતો આ નવયુવાન, સૌરાષ્ટ્રનો આ દીકરો આપણા વારસાને જાળવવા એક નવી જ ભાત લઈને આવ્યો છે.  

અમે આ વિશે સાંભળ્યું હતું, વિડીયો જોયા હતા, કેમ કે આ કાર્યક્રમ જોઈને આવીને મને મોકલનારા હતા મારા યુવાન સંતાનો.. પછી તા.10 જાન્યુઆરીએ નટરાણીમાં (દર્પણ – મૃણાલિની સારાભાઈની સંસ્થા) આ કલાકારનો કાર્યક્રમ ‘ભાથું’ જોયો અને થયું કે માતૃભાષા આમ બચે, વારસો આમ જળવાય !

મેઘાણીજીનાં ગીતો ‘કસુંબીનો રંગ’ ‘ચારણકન્યા’ અને સાથે, મારા વા’લાને વઢીને કે’જો, આવકારો મીઠો આપજે હો જી અને બીજાં અનેક ગીતો-ભજનો સાંભળ્યા. શિયાળાની ઠંડીમાં આ જોશીલા અવાજે, કોરસના લયબદ્ધ ગાને અમારા લોહીના એક એક બુંદને દોડતું કરી દીધું.  તો આજે જુઓ-સાંભળો ‘મન મોર બની થનગાટ કરે…’

એક વિડીયો યુટ્યુબ પરથી અને એક મેં પોતે લીધેલો  

તા. 10 જાન્યુઆરીએ નટરાની ખાતે મારા મોબાઇલમાં લીધેલી ક્લિક