છોડીને ખાબોચિયું જાતો નથી,
હંસ છે તું, કેમ શરમાતો નથી ?
એવું ક્યાં છે, જીવ વીંધાતો નથી,
એમ કાંઈ શ્લોક સર્જાતો નથી.
મોર છું, ટહુકીશ મારી રીતથી,
કોઈનીયે જેમ હું ગાતો નથી.
જીતવાની ઝંખના છોડી દીધી,
એટલે એ શખ્સ જીતાતો નથી.
કોઈ નીચે સાથે બેસી જાય છે,
આ સમય સ્હેજેય શરમાતો નથી !
એમાં ધિક્કારે છે આખુંયે ગણિત ?
દાખલો જો એક સમજાતો નથી !
છોડનું દુર્ભાગ્ય, બીજું શું કહું,
વડ કદી જો એને ખીજાતો નથી.
જિન્દગીનો કેટલો છે ત્યાં અભાવ,
ને બધાં ખુશ છે કે કરમાતો નથી.
~ રાકેશ હાંસલિયા