કજિયાનું મોં કાળું ….
ભરચોમાસે ફળિયા વચ્ચે કેમ ખાટલો ઢાળું ?
જાત વગરની ભાત વગરની હૈયે સળગે હોળી ;
થાકી હું તો એક સામટી ઇચ્છાઓને તોળી,
ઘરની ભીંતે કરોળિયાએ અઘાટ ગુથ્યું જાળું….
કજિયાનું મોં કાળું ….
અધ્ધરજીવે ક્યાં સંતાડુ રાત બાવરી સાવ;
ખાલીપાની માલીપાની પડઘા પાડે વાવ,
સૈકાઓથી જાડાં ઝીણાં જ્ન્મારાને ચાળું….
કજિયાનું મોં કાળું ….
~ સોલિડ મહેતા
મૂળ નામ હરીશકુમાર મહેતા.
સંગ્રહ ‘અંતરિયાળ’ (1982)