🔆નીનુ મઝુમદાર ~ સ્વર ઉદય મઝુમદાર, રેખા ત્રિવેદી🔆

આનંદ કેરી લહેરે જાણે હસી ઉઠ્યો કિરતાર
વેર્યાં ફૂલડાં અપરંપાર
ઘેલી વસંત આવી રે…ઘેલી વસંત આવી રે…!

ધરતીમાની લાડકડીની થઇ ચોમેર વધાઈ
કરિયાવરના લીલાં પટોળાં રહ્યાં બધે પથરાઈ
પંખીડાની સ્વાગત રાગે ગૂંજી ઉઠી શરણાઈ
ટહુકે કોયલ સૂર લગાવી, ઘેલી વસંત આવી રે…

ભિક્ષા યાચે ફૂલડે ફૂલડે ફરીને ભમરો ન્યારો
પાંખે વાગે ભિખારી કેરો ગુન ગુન ગુન એકતારો
દેતી જ્યાં ત્યાં પાન પાનમાં મસ્તીનો તડકારો
એવું દાન અનેરું લાવી, ઘેલી વસંત આવી રે…

મધુર એને પગલે પગલે ગુંજે રુમઝુમ ભાષા
સૂણી સુતેલા અંતર જાગે છુપી અનોખી આશા
સર્જનહાર ઉમંગે આજે રંગીન રચે તમાશા
નાચે છે નટરાજ નચાવી, ઘેલી વસંત આવી રે…

ગરબો લેતા ઘમ્મર ઘુમે રાત દિવસ રઢિયાળા
વર્ષ તણી પટરાણી કાજે સુંદર ગૂંથે માળા
જીવન સાગરમાં છલકાતા રસના ધોધ રૂપાળા
આજ નિરંતર ઉર બહાવી,ઘેલી વસંત આવી રે…

~ નીનુ મઝુમદાર

સંગીત : નીનુ મઝુમદાર

સ્વર : ઉદય મઝુમદાર, રેખા ત્રિવેદી