🔆સુરેન્દ્ર કડિયા ~ અડાબીડ આંખો🔆

*એમ લાગે*

અડાબીડ આંખો ગુલાબોથી પ્રોતું હશે એમ લાગે
તને કોઈ પડદો  હટાવીને  જોતું  હશે  એમ  લાગે

અનર્ગળ આ દરિયો આ આંસુ,, આ નદીઓ, ને વર્ષાના પાણી
પરાપૂર્વથી   કોઈ   પૃથ્વીને  ધોતું  હશે એમ  લાગે

સડેડાટ ગઝલોની ગઝલો વછૂટે છે ક્યાંથી, વિચારો
નિરાકારમાં કોઈ ખુદને જ  ખોતું હશે  એમ  લાગે

હશે મારી ભીતર ડૂબેલી એ નગરી ને એનીયે ભીતર
સુદામાની આંખો સતત કોઈ લોતું હશે એમ  લાગે

અમે એક વરસાદી પગલામાં આખો ઉમેર્યો છે શ્રાવણ
અને એ જ પગલાથી આંગણ પલળતું હશે એમ લાગે

~ સુરેન્દ્ર કડિયા

અહીં મકતાનો શેર રોમાન્સને અછડતો સ્પર્શે છે, ઊર્મિનો ઉછાળ ત્યાં વરતાય છે અને પછીના બધા શેર ચિંતનના સમુદ્રમાં ગરક છે.   

શું શું લાગી શકે કવિને ? એની કલ્પના કરવી વ્યર્થ છે. આ બ્રહ્માંડ આખુંય કે એનીયે પારનું કશુંક કવિ કલ્પી શકે. એટલે તો કવિ કહે છે, સડેડાટ ગઝલોની ગઝલો વછૂટે છે ક્યાંથી ?  

દરિયો, નદીઓ, વર્ષા અને આંસુ પહેલાં અનર્ગળ શબ્દ કેટલો સાર્થક પ્રયોજાયો છે ! પરાપૂર્વથી પૃથ્વીને ધોવા માટે તો આવો અમાપ, અનરાધાર પ્રવાહ જ જોઈએ…..

કલ્પનોના પ્રવાહમાં જળની નૈયા લઈને તરતો-ડૂબતો, નિરાકારમાં ખુદને ખોતો-ખોવાતો અને સુદામાની તરસ લઈને જીવતો નાયક અંતે એક પગલામાં શ્રાવણને સમાવી શકે છે…..

સમજવામાં ઓછી સરળ, વધુ ગંભીર અને ગહન ગઝલના રચયિતા આ કવિના દરેક શેર સ્પર્શી જ જાય…..

**

મિત્રો, ‘કાવ્યવિશ્વ‘માં આપના માટે 4220 થી વધુ કવિતાઓ હાજર છે.

જુઓ ‘કાવ્ય’ વિભાગ

વિભાગો ક્યાં મળે ?

કમ્પ્યુટરમાં : આ બધા વિભાગો આપને ઉપરના હેડર ફોટાની જરાક નીચે સૌથી ઉપરની લાઇનમાં એકસાથે જોવા મળશે.

મોબાઈલમાં : હેડર ફોટાની ઉપર જમણી બાજુ ખૂણામાં આપને ત્રણ લાઇન દેખાશે. એના પર ક્લિક કરતાં બધા વિભાગોના નામનું લિસ્ટ દેખાશે.

કોઈપણ વિભાગ પર ક્લિક કરતાં એ વિભાગની બધી પોસ્ટ એકસાથે જોઈ શકાશે.  

🙏આજ સુધીમાં 1556 અંકની 5314 પોસ્ટ, દોઢ લાખથી વધારે વિઝીટર્સ અને ત્રણ લાખથી વધારે વ્યુઝ સાથે, ‘કાવ્યવિશ્વ’ પાંચ વર્ષ (9.10.2020) પૂરાં કરીને છઠ્ઠા વર્ષમાં પ્રવેશ્યું છે. આપના અદભુત સહયોગ બદલ આભારી છું. – સંપાદક : લતા જગદીશ હિરાણી🙏