🔆ઈશિતા દવે ~ જે છે બધું🔆 -

*વાર તો લાગે જ ને !*

જે છે બધું એ છોડવામાં વાર તો લાગે જ ને!
આ જાત આખી ખોળવામાં વાર તો લાગે જ ને!

મેં જિંદગી આખી ભલે તડફડ કરી તોડ્યું બધું,
એકાદ સગપણ જોડવામાં વાર તો લાગે જ ને !

વર્ષો પછી આજે ટકોરા કોઈએ માર્યા અહીં
તો બારણાંને ખોલવામાં વાર તો લાગે જ ને !

બેરંગ મેં તો ખુદ કરી’તી આયખાની ભીંતને,
એવી દિવાલો ધોળવામાં વાર તો લાગે જ ને !

જેઓ હ્દયમાંથી અહીં ઉતરી ગયા છે ક્યારનાં,
ઘરમાં છબી એ ચોડવામાં વાર તો લાગે જ ને !

લોકો, ગલી ને ગામ ઉપરથી આ પહેરો આંખનો,
એ બંધનોને તોડવામાં વાર તો લાગે જ ને !

જે હાથતાળી દઇ મને ખુદ ભાગવા જાતા હતા,
એ શ્વાસ પાછા ખોડવામાં વાર તો લાગે જ ને

~ ડૉ. ઈશિતા દવે

કારણદર્શક ગઝલ પણ ગળે ઉતરી જાય એવા જ કારણો ! વાહ ઈશિતા

દમદાર લખતી કવયિત્રી હમણાં ખોવાઈ ગઈ છે.

કાવ્યસંગ્રહ- ‘ સમયના સથવારે ‘ ( ગઝલ સંગ્રહ)

વિરલ વ્યાસ

27/05/2026 at 8:43 am

વાર તો લાગે જ ને ….વાહ સરસ

છબીલભાઈ ત્રિવેદી

27/05/2026 at 8:47 am

વાહ અદભુત આ બધુ કરવા મા વાર તો લાગે…ખુબ ગમી અભિનંદન

હરીશ દાસાણી.મુંબઈ

27/05/2026 at 11:40 am

સરસ ગઝલ

'સાજ' મેવાડા

27/05/2026 at 12:15 pm

વાહ, ખૂબ સરસ, ‘વાર તો લાગે જ ને ‘ રદિફ નિભાવ્યો.

Kavyavishva

28/05/2026 at 8:29 am

‘કાવ્યવિશ્વ’ની મુલાકાત લઈ પ્રતિભાવ લખનાર મિત્રોનો ખૂબ ખૂબ આભાર.
‘કાવ્યવિશ્વ’ની મુલાકાત લેનારા મિત્રોનો પણ એટલો જ આભાર.
https://www.kavyavishva.com

🔆ઈશિતા દવે ~ જે છે બધું🔆