🔆કૃષ્ણ દવે ~ મમ્મી પપ્પાઓ🔆

મમ્મી પપ્પાઓ જરા થોભજો !

મમ્મી પપ્પાઓ જરા થોભજો !
ફેમસ બનાવવાની આપશ્રીની ઈચ્છાને નાનકડા ખભ્ભે ના થોપજો
મમ્મી પપ્પાઓ જરા થોભજો !

પોપટની જેમ બધુ પટ પટ બોલાવશો તો વિડિયાઓ વાયરલ પણ થાશે
શું થાશે ? “સમથીંગ છું” એવો એકાદ રોગ બચપણથી ઘર કરી જાશે !
બોર ખાવા જાશો તો કાંટા પણ વાગશે જ, પોતે પોતાને જરા રોકજો
મમ્મી પપ્પાઓ જરા થોભજો !

છાંટી છાંટીને તમે મહેકાવ્યે રાખશો પણ અત્તર તો કાલ ઊડી જાશે
પ્લાસ્ટિકના ફૂલોનું એક જ છે દુઃખ એ તો ખરવાનું સાવ ભૂલી જાશે
પોતાની મોજથી જે ટહુકા કરે ને ભાઈ એને ના કોઈ દિવસ ટોકજો
મમ્મી પપ્પાઓ જરા થોભજો !

બે વર્ષ પહેલાં સમાજને લાલબત્તી ધરતી લખાયેલી મારી આ રચના.

કૃષ્ણ દવે
તા-25-9-2023

આજકાલ ગાંધીનગરના ઈશિત ભટ્ટનો વિડીયો વાયરલ છે. ઈશિતે KBCમાં ભાગ લીધો હતો અને હોટ સીટ પર બેસી અમિતાભ બચ્ચનજી સાથે ઉદ્ધતાઈભર્યું વર્તન કર્યું હતું. સોશ્યલ મીડિયામાં એની ખૂબ ટીકા થઈ રહી છે.

કવિ કૃષ્ણ દવે સાંપ્રત પરિસ્થિતી પર તરત ચોટદાર કવિતાઓ લખવા માટે પ્રખ્યાત છે. જોકે આ ગીતમાં પોતાની મહત્વાકાંક્ષાઓ બાળકને માથે ન લાદવા પર ભાર છે અને જો બાળક કશુંક પામે તો એના માટે અહં સવાર થઈ જાય એ ચેતવણી છે. એટલે આ ઈશિતાના કિસ્સામાં લાગુ પડે જ છે.

લોકો ઈશિતના વર્તન માટે ખૂબ આક્રોશ બતાવે છે. એ સાચું પણ છે. આટલી ઉદ્ધતાઈ ન જ ચાલે પરંતુ વાંક માબાપનો છે. જેઑ બાળકને કેળવવામાં ઊણા ઉતર્યા છે. બાળકને વિવેક, વિનય, રીતભાત શીખવવા જ જોઈએ. ઈશિતનું વર્તન ઘરમાં અને બહાર બધા સાથે આવું જ હોય તો જ આમ બને. અને માબાપ સહિત કોઈએ એને ટોક્યો નથી, રોક્યો નથી, સાચું શીખવાડયું નથી….. ઊલટાનું એની આવી રીતભાત પોષી છે, એ બદલ ગૌરવ અનુભવ્યું છે.

આ માબાપને ખબર જ નથી કે આ વિવેક વિનય એટલે શું ચીજ છે?