🔆પરબતકુમાર નાયી ~ છોકરી હળવેકથી🔆 -

*છોકરીનું શેરીગીત*

છોકરી હળવેકથી કોડી ઉલ્લાળે,
દરિયા શી ફાટફાટ છોકરીને શેરી પણ ખાળે તો કેમ કરી ખાળે ?

મોગરાના ફૂલ જેવાં ટેરવાંથી ચિતરતી ઉભરાતા મોજાંની વાત,
ઝાંઝરની ઝીણી એક રણઝણથી બપ્પોરે પાદરમાં બેસે પંચાત !
છોકરીનાં સપનાં તો ગામ આખું ભાળતું, છોકરી ક્યાં કોઈને ભાળે ?

ઈશારો આખો કે અડધો શું હોય ? નથી છોકરાને સમજાતો ભેદ
બેડી નથી ને તોય બંધાતો જાય, અરે ! કેવી આ પાંપણની કેદ ?
કમખામાં મોરલાઓ ગૂંથે ને કંઠમાં કોયલના ટહુકાઓ પાળે.

~ પરબતકુમાર નાયી

આ ગીત વાંચતાં રમેશ પારેખ યાદ આવી જ જાય ‘એક છોકરીના હાથથી રૂમાલ પડે, એ લેવા આખ્ખુંય ગામ વળે નીચે…..”

યુવાન અલ્લડ છોકરી પર ગીતો લખાયાં છે અને લખાતાં રહેશે. આ વિષય જ એવો છે. લખવા અને વાંચવામાં રસદાર. ગીત સ્વરૂપ આ વિષય માટે વધારે અનુકૂળ.

પણ આ વિષયને ન્યાય આપવો જરા અઘરો ખરો. છોકરીની જુવાની જેવું ઊછળતું અને રણઝણતું ગીત જ ભાવકને તરબોળ કરી શકે. ઉડાન ભરતાં કલ્પન, સુચારુ શબ્દયોજના, પ્રવાહી પ્રાસયોજના, અને લયનો ઉછાળ આ બધું સુવાંગ સચવાય ત્યારે આવું ગીત નીપજે. જુઓને, ‘ઉલ્લાળે’, ‘બપ્પોરે’ જેવા શબ્દોમાં વર્ણને ચડાવેલો વળ અને એટલે નીપજેલો અર્થભાર લયને રમણે ચડાવે છે. કવિ પરબતકુમારની કલમ આમાં સફળ જ નથી, ખીલી છે એમ કહેવું પડે!

🙏🏻આપ ‘કાવ્યવિશ્વ’ના નિયમિત મુલાકાતી છો એનો આનંદ છે. સાઇટના આ નવા સ્વરૂપમાં આપને ફરી subscribe કરવાનું રહેશે. એટલો સહકાર જરૂર મળશે. આભાર. આપના પ્રતિભાવો આનંદ અને ઉત્સાહ આપશે. આભાર. – સંપાદક🙏🏻

કિશોર બારોટ

07/10/2025 at 10:12 am

રમતીયાળ ગીત. 👌

રેખા ભટ્ટ

07/10/2025 at 10:53 am

ખૂબ મજાનું ગીત. વાહ 🙏

કરશન
07/10/2025 at 9:10 pm

અતિ સુંદર 👌

Loading...

Parbatkumar nayi

07/10/2025 at 11:23 am

આભાર આદરણીય લતાબેન 👏

Anonymous
07/10/2025 at 8:38 pm

બહુ સરસ ગુરુજી ગામડા ની ગલી‌ઓ ને યાદ કરી

Loading...

Jagrat Vyas
07/10/2025 at 9:51 pm

ખૂબ સરસ ગીત.

Loading...