🔆મણિલાલ હ. પટેલ ~ પંખીઓ ગાય છે🔆

પંખીઓ ગાય છે ને થાય છે કે
એ તો મારે માટે ગાય છે
બાકી તો પડછાયા આવે ને જાય છે

પંખીઓ ગાય છે તો અજવાળું થાય છે
બાકી તો અંધારે સઘળું લીંપાય છે

કોઈ કહે છે કે
પંખી તો ઝાડ માટે ગાય છે
એટલે તો કૂંપળની કળી બની જાય છે

કોઈ કોઈ એવું પણ કહે છે કે
પંખી તો પ્હાડ માટે ગાય છે
એટલે તો કાળમીંઢ ડૂમો પણ
કલકલતું ઝરણું થૈ જાય છે

પંખી તો માટીની મૌજ સારુ ગાય છે
એટલે તો કોળેલું તરણું પણ
ડૂંડાંથી લ્હેરાતું ખેતર થૈ જાય છે

સાચ્ચું પૂછો તો, ભૈ !
કલરવતાં પંખીઓ મર્મરતી મોસમ થૈ જાય છે

પંખીઓ ગાય છે ને આપણા તો-
બત્રીસ કોઠામાં દીવાઓ થાય છે.

~ મણિલાલ હ. પટેલ

આજે છે વિશ્વ પ્રાણી કલ્યાણ દિન.

કવિએ કેટલી સંવેદનશીલ વાત મૂકી છે ! પંખીઓ ગાય છે તો આપણા બત્રીસ કોઠામાં દીવાઓ થાય છે!

🙏🏻આપ ‘કાવ્યવિશ્વ’ના નિયમિત મુલાકાતી છો એનો આનંદ છે. સાઇટના આ નવા સ્વરૂપમાં આપને ફરી subscribe કરવાનું રહેશે. એટલો સહકાર જરૂર મળશે. આભાર.  આપના પ્રતિભાવો આનંદ અને ઉત્સાહ આપશે. આભાર. – સંપાદક🙏🏻

જુઓ સર્જક મણિલાલ હ. પટેલનો પરિચય

સર્જક મણિલાલ હ. પટેલ