🔆ભીખુભાઈ ચાવડા ‘નાદાન’ ~ શુભલાભ દીધા🔆 -

શુભલાભ દીધા, સાથિયા ને શ્રી-સવા દીધા
ઘરમાં પછી જગતના પવન આવવા દીધા

મેંદીભર્યા ચરણ તો સતત સાથિયા રચે
આ ઉંબરાને મુઠ્ઠી-ઉંચેરા થવા દીધા

બહુ ખાનગી છે વાત જરા કાનમાં કહું
ગમતા’તા એટલે તો વધુ ચાહવા દીધા

નીકળી છે વાત તો આ પવનનેય કહી દઉં
જા સાચવીને, રાહ તને અવનવા દીધા

પકડીને કોણ બેસી રહે, આ હવા છે, દોસ્ત
જે શ્વાસ આવતા રહ્યા એ પણ જવા દીધા

એની સભા છે ચુપ રહી જે થાય તે જુઓ
‘નાદાન’ પાડ માનો અહીં બેસવા દીધા

~ ભીખુભાઈ ચાવડા ‘નાદાન’ (7.9.1934)

🔆ભીખુભાઈ ચાવડા ‘નાદાન’ ~ શુભલાભ દીધા🔆