🔆’અગન’ રાજ્યગુરુ ~ તું સવાલો🔆 -

તું સવાલો આંખથી જો પૂછશે
તો મને ક્યાંથી જવાબો સૂઝશે?

રેશમી અહેસાસનો આ તાંતણો,
ખેંચવા જાશું વધુ તો તૂટશે.

કલ્પના તારી કરું તો થાય કે,
શ્વાસ દિલની વાંસળીમાં ફૂંકશે.

જે નથી નમતું જગતમાં કોઈને,
એ હ્ર્દય તારી કને તો ઝૂકશે.

પ્રેમનો સજ્જડ પુરાવો થઈ જશે,
જેટલી વેળા વધુ તું રુઠશે.

આપણે સામા મળ્યા તો શક્ય છે
એક ધબકારો હ્ર્દય પણ ચૂકશે.

માવજત થોડી ‘અગન’ થઈ જાય તો,
આપણી આંખોમાં સપનાં ઉગશે.

~ ‘અગન‘ રાજ્યગુરુ

પ્રેમકાવ્યોથી કદાચ તમામ ભાષાના સાહિત્ય છલકાતાં હશે. માનવીને જન્મ સાથે મળેલી ભેટ. માણસ પ્રેમમાં પડે એટલે એને કવિતા જેવું કૈંક કરવાનું મન થાય. જોકે શબ્દો સાથે દોસ્તી એટલી સહેલી નથી. એ તો અંદરથી એટલી અગન અને લગન હોય તો શબ્દો રીઝે ! કોઈક નવા સૌંદર્ય સાથે કવિની કલમથી પ્રસવે.

આ ગઝલ એવું જ કૈંક લઈને આવી છે. ઈશ્ક મહોબ્બતની વાત અને એક જુદા જ અંદાજમાં. પ્રિયજન આંખથી કૈંક કહે, માત્ર આટલું જ સામેની વ્યક્તિને અવાક કરી દેવા માટે પૂરતું હોય!

અને જુઓ, ‘પ્રેમનો સજ્જડ પુરાવો થઈ જશે, જેટલી વેળા વધુ તું રુઠશે.’ સહજ વાતની સુંદરતા.