🔆શૈલેષ શાહ ‘શૈલ’ ~ ચડી આવ્યાં ક્યાંથી🔆

શિખરિણી-સૉનેટ

ચડી આવ્યાં ક્યાંથી ગડગડ કરી  વાદળદળો.
છવાયું  અંધારું,  પલક  પળમાં  સૂરજ  ડરી-
ગયો ક્યાં  જાણે, પવન પણ જો રંગ પલટ્યો.
રહ્યાં  ડોલી  વૃક્ષો,  હરખભર  જે  કૈંક કથતાં.

ભરી   દેતા  આખા   ગગનસદને   મોર-ટહુકા,
વળી   નાચે,   પીંછાં  ફરફર  કરી  ગેલ  કરતાં,
કરી   દોડાદોડી પતવી  સઘળાં  કામ  નિજનાં
જનો  આવી ઊભાં સમયભર  કો’ છત્તર તળે.

પડ્યો  ધીમે  ધીમે  સર સર  કરી  મેઘ  નભથી,
ચડ્યો  તોફાને  ત્યાં  ધમધમ  કરી  સાદ  કરતો,
ઉઘાડી    છત્રીને   નગરજન   કો’  નિર્ભય   ફરે,
થયું   ભીનું   ભીનું   નગર  સઘળું, અંતર  વળી.

ઝરૂખે બેસીને   ઘડપણવયે  એક  જન   આ,
નિહાળે પોતાનું  બચપણ  અહીં  સ્નાન  કરતું.

~ શૈલેશ શાહ ‘શૈલ’

ભલે આ વરસાદી મોસમ રહી પણ આ સમય જુદો છે. વરસાદની આહલાદકતા દૂર પેલા પહાડોમાં થતાં તોફાનોથી ઝાંખી પડી છે. ચિંતાના વાદળોની આવ-જાવ ચાલુ છે. પણ આપણે કવિતા તરફ જ રહીએ.

છંદોબદ્ધ રીતે વરસાદી મોસમનું મજાનું વર્ણન. કવિતા જરૂર સુખ આપે એવી છે. અને વૃદ્ધાવસ્થામાં બાળપણનો આનંદ લેવાની વાત મનમાં ફરીને એક સુખની લહેર અને રોમાંચ ભરી દે.  

કવિ ઓછું લખે છે અને આ સોનેટ જોઈ કહેવાનું મન થાય કે લખો, કવિ લખો !

કવિનો એક કાવ્યસંગ્રહ છે. ‘ખૂલવાનું હોય કેવળ આપણે’ * પ્ર. સ્વયં 2020