🔆દિનેશ ડોંગરે ~ પ્હો ફાટી ને🔆

પ્હો ફાટી ને સમણું આવ્યું, હરિવર મળવા આવ્યા,
જનમ જનમની દુઃખિયારીના દયણાં દળવા આવ્યા.

જીવતર જેવું જીવતર પણ ના કંઈ મુને જડતું,
આંખો સામે સઘળું તોયે નજરે કાંઈ ન પડતું.
સાવ અમસ્તા દર્શન દઈને પાછા વળવા આવ્યા.
પ્હો ફાટી ને સમણું આવ્યું હરિવર મળવા આવ્યા.

સમજણ જેવી સમજણને પણ લાગ્યો જાણે લૂણો,
આમ હરખનો પાર નંઈ ને ભીનો આંખનો ખૂણો.
બસ રિઝાયા આમ જ કે પછી હાલત કળવા આવ્યા.
પ્હો ફાટી ને સમણું આવ્યું હરિવર મળવા આવ્યા.

અપલક નીરખું હું હરિને કે હરિવર મુજને જોતા,
હું ભાનમાં આવતી જાતી હરિવર સુધબુધ ખોતા.
છલકાયું છે હેત કે પાછા મનને છળવા આવ્યા?
પ્હો ફાટી ને સમણું આવ્યું હરિવર મળવા આવ્યા.

~ દિનેશ ડોંગરે

હરિકાવ્યો ખૂબ લખાયા છે. એમાં કશુંક સ્પર્શી જાય એવું લઈને આવતા કાવ્યો પ્રમાણમાં ઓછા…. આ ગીત મને સારું લાગ્યું.