🔆કૃષ્ણ દવે ~ રેગીંગ કરવું કે🔆

*અણસમજુ હાથ*

રેગીંગ કરવું કે પછી હત્યાઓ કરવી એ બાળકોનું એકલાનું કામ છે ?
અણસમજુ હાથોમાં મોબાઈલ દીધાં ને એનું આ વરવું પરીણામ છે

નહિતર વિકૃતિઓ સામે ચાલીને કાંઈ કૂમળા દિમાગમાં ના ઘૂસે
આપણને જોઈ જોઈ આદત પડે ને પછી આખ્ખી માસુમિયતને ચૂસે
લાકડાનું ઘર છે ને ઉધઈ લાગી ગઈ ને તોય તમે ક્યો છો આરામ છે ?
અણસમજુ હાથોમાં મોબાઈલ દીધાં ને એનું આ વરવું પરીણામ છે

ગેમ અને રીલોનો ભૂખ્યો ભોરીંગ હવે બચપણને ભરડો લઈ બેઠો
નહિતર પ્રહલાદ અને ધૃવનો આ દેશ એમ એકાએક આવે ના હેઠો
ક્યાં ગઈ એ સંસ્કૃતિ ? ક્યાં છે સંસ્કાર ? તમે ઊંઘી શકો છો ? સલામ છે.
અણસમજુ હાથોમાં મોબાઈલ દીધાં ને એનું આ વરવું પરીણામ છે.

~ કૃષ્ણ દવે

છાપાં વાંચીને અરેરાટી અનુભવવાના દિવસો પણ પૂરાં થઈ ગયા…. બાળકોમાં વ્યાપતી વિકૃતિઓ સીમા વટાવતી જાય છે. આવતી કાલનું ભવિષ્ય છે એવાં બાળકો પર જો આ અંધકારે ભરડો લીધો છે તો એમનાં ભવિષ્યનું શું ? એ કેવા સમાજમાં જીવશે ?

અને છતાંયે આપણે હજી ઊંઘીએ છીએ એ હકીકત છે!

 🙏🏻આપ ‘કાવ્યવિશ્વ’ના નિયમિત મુલાકાતી છો. આપ આ સાઇટ subscribe કરો એવી અપેક્ષા. જો અગાઉ આપે subscribe કર્યું હશે તો ‘કાવ્યવિશ્વ’ના આ નવા સ્વરૂપમાં આપને ફરી subscribe કરવું પડશે. ઉપર જ જમણી બાજુ subscribe લખ્યું છે ત્યાં ક્લિક કરતાં ઈમેલ લખવાનું ઓપ્શન મળશે. આભાર🙏🏻