🔆જયેન્દ્ર શેખડીવાળા ~ નર્મદ રાજ્જાની યાદમાં🔆

નર્મદ રાજ્જાની યાદમાં

અમે જીતવા જંગ નીકળ્યાં કયાંય બ્યૂગલ ના વાગ્યાં
ભાથામાંનાં તીર બધાં યે પાછાં ફરતાં લાગ્યાં

જેમ હણાયો, તેમ ગવાયો
એમ ઘવાયો, કેમ મરાયો?

નરકુંજર નરકુંજર કરતાં લોક હજી ના જાગ્યાં
અમે જીતવા જંગ નીકળ્યાં ક્યાંય બ્યૂગલ ના વાગ્યાં

તું રઘવાયો, એ ગભરાયો
તે ઝડપાયો, હું પડઘાયો

માણસડાં અર્વાચીનડાંએ એકબીજાને દાગ્યાં
અમે જીતવા જંગ નીકળ્યાં કયાંય બ્યૂગલ ના વાગ્યાં

ધન ધડાકા, Gun ભડાકા
જન જડાકા, મન મડાકા

ભાંગ્યા, તૂટ્યાં, ફાટ્યાં, ફૂટ્યાં સૌ અમરિકે ભાગ્યાં
અમે જીતવા જંગ નીકળ્યાં કયાંય બ્યૂગલ ના વાગ્યાં

નાડ નગરથી, વાડ વગરથી
બાળ બચરથી, તાડ ટગરથી

તા તા તેં તેં બેં બેં બોલી ક્રાઉં ક્રાઉં સહુ કાગ્યાં
અમે જીતવા જંગ નીકળ્યાં કયાંય બ્યૂગલ ના વાગ્યાં

પાઉન્ડ પારાં, રાઉન્ડ મારાં
ગ્રાઉન્ડ ગારાં, સાઉન્ડ સારાં

એક્સ, વાય ને ઝેડ હજારાં, ડગલે પગલે થાક્યાં
અમે જીતવા જંગ નીકળ્યાં કયાંય બ્યૂગલ ના વાગ્યાં

~ જયેન્દ્ર શેખડીવાળા

 🙏🏻આપ ‘કાવ્યવિશ્વ’ના નિયમિત મુલાકાતી છો. આપ આ સાઇટ subscribe કરો એવી અપેક્ષા. જો અગાઉ આપે subscribe કર્યું હશે તો ‘કાવ્યવિશ્વ’ના આ નવા સ્વરૂપમાં આપને ફરી subscribe કરવું પડશે. ઉપર જ જમણી બાજુ subscribe લખ્યું છે ત્યાં ક્લિક કરતાં ઈમેલ લખવાનું ઓપ્શન મળશે. આભાર🙏🏻