મકરંદ દવે ~ ખુલ્લા મેદાનમાં

🥀🥀

‘મનુષ્યમાં પોઢેલા મહાવીરને’

ખુલ્લા મેદાનમાં ખેલો
બજરંગ હવે ખુલ્લા મેદાનમાં ખેલો
ગામ ગામ રાવણના થાણા જામ્યા છે ને
જામ્યો વેતાળનો જમેલો

હાક પાડીને હવે ઊઠો હનુમાન
આવી જુલમી જમાતને હડસેલો
રાંકડી પ્રજાને પાવ દૈવતનો પ્યાલો
જે રામજીના પ્રેમથી ભરેલો

સાફ કરો સેતાની દોર ને દમામ સાવ
સત્તાના રોગથી મઢેલો
આવો પ્રચંડ વીરા, ભાંગો ઘમંડ
હવે ડાંગો ગઢ સોને મઢેલો

છેલ્લો પુકાર સુણો મદથી છકેલ
આ હુંકારે બજરંગ રણઘેલો
બજરંગ હવે ખુલ્લા મેદાનમાં ખેલો

~ મકરંદ દવે (13.11.1922 – 31.1.2005)

રચના કાળ 2002