સુરેશ દલાલ ~ આટલું બધું વ્હાલ * સ્વર અમર ભટ્ટ – શ્યામલ મુનશી

🥀 🥀

આટલું બધું વ્હાલ તે કદી હોતું હશે ?
કોઈ પારેવું વાદળભરી રોતું હશે ?

જીવનમાં બસ એક જ ઘટના, એક જ ઘટના
ભીતર એક જ નામની રટના, નામની રટના.
પોતાનું તે નામ કદી કોઈ ખોતું હશે ?
કોઈ પારેવું વાદળભરી રોતું હશે ?
આટલું બધું….

જીરવ્યો કેમ રે જાય વલોપાત આટલી હદે ?
આટલો બધો પ્રેમ શું કદી કોઈને સદે ?
નજર લાગે એમ શું કોઈને જોતું હશે ?
કોઈ પારેવું વાદળભરી રોતું હશે ?

આટલું બધું…  

~ સુરેશ દલાલ

2025ના નવા વર્ષનો પ્રથમ દિવસ !

‘કાવ્યવિશ્વ’ પર આપ સૌને વ્હાલભરી શુભેચ્છાઓ આપવા મારે શું મૂકવું એ વિચારતી હતી
અને યાદ આવ્યું, હમણાં ઘણાં સમયથી ગીતો નથી મુકાયા….

આવું સરસ ગીત અને એને એટલી જ મધુર રીતે ગાનારા બે ગાયકો શ્યામલ મુનશી અને અમર ભટ્ટ

આહા.. મન સભર સભર થઈ ગયું…..સૌ કાવ્યપ્રેમીઓને અઢળક સંગીતમય શુભેચ્છાઓ

**

આટલું બધું વ્હાલ * સુરેશ દલાલ * સ્વર અને સ્વરાંકન અમર ભટ્ટ

આટલું બધું વ્હાલ * સુરેશ દલાલ * સ્વર શ્યામલ મુનશી * સ્વરાંકન શ્યામલ-સૌમિલ મુનશી