🔆લલિત ત્રિવેદી ~ ટેરવે મળે નવકાર🔆 -

અબુધ ઉદય તો શું જાણે કે શું ક્ષમણ એનું
હે દાતા શાતાના, દેજો શુદ્ધિકરણ એનું

થજો રે ક્ષીણ આ ભવકાર નિશ્ક્રમણ એનું
કે ટેરવે મળે નવકાર ને સરણ એનું

આ તનવિહાર લગાતાર ભોગવણ એનું
ખમી ખમાવી શકાશે શું આક્રમણ એનું?

લગાવ લાગ અતિચાર પરિગ્રહણ એનું
આ પાણિયારામાં થાશે શું નિમજ્જણ એનું?

થશે શું નિર્જરા? થાશે હળુકરણ એનું?
સરાગી દામીને માગે ચરણશરણ એનું

હું ક્યાં મુમુક્ષુ છું, લોલુપ હું બુભુક્ષુ છું
હું રોજરોજનાં સ્ખલનો ને સંગ્રહણ એનું

નહીં તો ભિન્ન ક્યાંથી હોય મન ને મનજીરાં ?
દિયો રે ચક્ષુને સમ્યગ ને નિર્વહણ એનું

રે, ક્યાં સુધી આ ભજવણાં ને ઉજવણાં એનાં
કરો રે છેલ રે વહેલું પ્રતિક્રમણ એનું

તમસ ન દૃષ્ટિનું ન અન્નનું ન કંચનનું
ફળી ગયું છે કોને તન ને પર્યુષણ એનું?

~ લલિત ત્રિવેદી

કેટલાંક શબ્દોનાં અર્થ, સવિનય… (કવિ તરફથી)

ક્ષમણ .. તપસ્યા
ઉદય.. કરમ
નિશ્ક્રમણ.. બહાર નીકળવું
ખમાવવું.. ક્ષમા માગવી
નિર્જરા… આત્મપ્રદેશથી કર્મને છુટ્ટા પાડવા
હળુકરણ.. કરેલાં કર્મોની રોજ ક્ષમા માગવી
સમ્યગ. યોગ્ય

એક ગઝલ – જૈન શબ્દાવલિ ધરાવતી
આ ગઝલ વિશે મારાથી કશું લખી શકાય નહીં.

🙏🏻આપ ‘કાવ્યવિશ્વ’ના નિયમિત મુલાકાતી છો. આપ આ સાઇટ subscribe કરો એવી અપેક્ષા. જો અગાઉ આપે subscribe કર્યું હશે તો ‘કાવ્યવિશ્વ’ના આ નવા સ્વરૂપમાં આપ ફરી subscribe કરશોજી. ઉપર જ જમણી બાજુ subscribe લખ્યું છે ત્યાં ક્લિક કરતાં ઈમેલ લખવાનું ઓપ્શન મળશે. આભાર🙏🏻

છબીલભાઈ ત્રિવેદી

20/08/2025 at 8:58 am

વાહ ખુબ સરસ ગઝલ આપે ખુબ સરસ વાત કહી કોઈ રચના ને બીબા મા ન ઢાળી શકાય ખુબ અભિનંદન જય જિનેન્દ્

Mohanbhai Parmar

20/08/2025 at 2:19 pm

વાહ વાહ વાહ

પુરુષોત્તમ મેવાડા 'સાજ'

20/08/2025 at 4:07 pm

વાત કરી કે જૈન ગઝલ કહી શકાય, બાકી અન્યથી એને સમજવી અઘરી છે. મિચ્છામી દુક્કડમ!

Varij Luhar

21/08/2025 at 10:31 am

વાહ.. એકદમ અનોખી શૈલીથી અત્યંત ભાવપૂર્ણ ગઝલ.. મિચ્છામિ દુક્કડમ

ઉમેશ જોષી

21/08/2025 at 10:37 am

વાહ સકળ શે’ર આધ્યાત્મિક ભાવસભર છે..
અભિનંદન.

Minal Oza

21/08/2025 at 11:11 am

મિચ્છામી દુક્કડમ.જય જિનેન્દ્ર.

લલિત ત્રિવેદી

21/08/2025 at 2:07 pm

ખૂબ ખૂબ આભાર, લતાબેન… સહુ મિત્રોનો ખૂબ ખૂબ આભાર. મિચ્છામી દુક્કડમ… આપ અને મિત્રો ભૂલચૂક ક્ષમા આપે એવી વિનંતી . ગુજરાતી ગઝલમાં જૈન પદાવાલિ ધરાવતી…. કદાચ ઓછી જોવા મળતી આ ગઝલ હશે એમ હું… સવિનય માનું છું… ફરી, મિચ્છામી દુક્કડમ