🔆રમણલાલ પંડ્યા ‘સનાતન’ ~ કિશોરો વસ્ત્રોમાં🔆

*લગ્નનું ઘર*

કિશોરો વસ્ત્રોમાં નવીન બનીને છેલછબીલા
રમે પત્તાં ભેળાં સમવય થઈ મંડપ તળે;
શિશુ નાનાં ભોળાં અહીંતહીં દડે કંદુક સમાં
રજોટાઈ ધૂળે ધૂળ થકીય થાતા મલિન જે.

પણે બારીમાંથી નીરખી રહી છે વાગવધૂઓ,
ઘૂમન્તા ટોળામાં, શરમ થકી જેની નજર ના
થતી ઊંચે તેના તરુણવય વ્યાહેલ પતિઓ;
અગાશીના ખૂણે નવપરિણીતો બે મળી રહ્યાં.

બજે વાજાં, સાથે સૂરબસૂરશા બ્રાહ્મણ તણા!
અને વચ્ચે વચ્ચે ઊઠતી બૂમ પાકગૃહ થકી,
જલે ચોરી તેની ઊઠતી ધૂણી પૂરંત દૃગને,
મચે ચોપાસે શો કલબલ દધિગર્જન સમો!

પરંતુ કન્યાનું દિલ અહીંથી ક્યાંયે દૂર દૂરે
અજાણ્યા સાથીની મધુર સ્મૃતિમાં મત્ત ધબકે.

~ રમણલાલ પંડ્યા ‘સનાતન’ (18.7.1918-12.7.1987)

સાવલીમાં જન્મ. ‘ઉશનસ્‘ના મોટા ભાઈ. તેઓ રામનારાયણ પાઠકના વિદ્યાર્થી હતા.
સંસ્કૃતિ, કુમાર, પ્રસ્થાન વગેરેમાં તેઓ લખતા.