મુકુંદરાય પટ્ટણી ‘પારાશર્ય’ ~ બેન બંધાતી છીપલી

🥀🥀

બેન, બંધાતી છીપલી ખોલીએ નૈં
બેન, ઉરની સુવાસને તોળીએ નૈં
બેન, જીવવાના અવસરને ટાણે એ પ્રીતડી બોલીએ નૈં

બેન, આછરતાં નીરને ડોળીએ નૈં
બેન, પોતાની છાંયમાં મોહીએ નૈં
બેન, અંતર-વસનારને સેવ્યા વિણ એકલાં સૂઈએ નૈં

બેન, કાચી કળિયુંને કદી તોડીએ નૈં
બેન, સરજાતી સુરભિને વેરીએ નૈં
બેન, ઋતુવરના સ્પર્શની વેલાં થઈ ફૂલડું ખીલીએ નૈં

બેન, મધુવનની વાતડી છેડીએ નૈં
બેન, પામ્યા સંકેતને બોલીએ નૈં
બેન, માધવનું હેત મળ્યું કેવું, એ કોઈને કહીએ નૈં

બેન, હું પદ રાખી એને પેખીએ નૈં
બેન, વિરહે દાઝીને એને ભેટીએ નૈં
બેન, ફૂલડાંનો હાર થયા પ્હેલાં શ્રીકંઠમાં પડીએ નૈં

~ મુકુંદરાય પટ્ટણી ‘પારાશર્ય‘ (13.2.1914 થી 20.5.1985)

🥀🥀

કવિના જન્મદિને સ્મૃતિવંદના.

કવિને 1978માં નર્મદસુવર્ણચંદ્રક

કાવ્યસંગ્રહો :

1. અર્ચન 1938 2. સંસૃતિ 1941 3. ફૂલ ફાગણનાં 1956 4. દીપમાળા 1960 5. કંઠ ચાતકનો 1970

6. પ્રાણ બપૈયાનો 1979  7. ભદ્રા 1981 

@@