અદમ ટંકારવી ~ બારાખડી વટાવ પછી

🥀 🥀

*એક મુકામ છે*

બારાખડી વટાવ પછી એક મુકામ છે
ભાષાભવનને પાર ફકીરોનું ધામ છે

તમને અડ્યો ને ટેરવું ઝળહળ થઈ ગયું
નાની-શી એ ઘટનાનું હવે સૂર્ય નામ છે

એના વિચાર એની લગન એની ચાકરી
લઈદઈને આપણે તો હવે એ જ કામ છે

ઘર શૂન્ય ગામ શૂન્ય ને પીનકોડ શૂન્ય શૂન્ય
દીવાનગીનું તો ક્યાં કશું નામઠામ છે

તોબા કરી તો એનું પરિણામ જોઈ લ્યો
છે દિલ હવે સુરાહી અને આંખ જામ છે

સ્મશાનવત્ બજારો કબરવત્ ઘરો અદમ
લાગે છે કોઈ સંત વિનાનું આ ગામ છે

~ અદમ ટંકારવી