🥀 🥀
એક દીપ તણાયો જાય, જલમાં દીપ તણાયો જાય;
કમળ સમો ઘૂમે વમળોમાં, વાયુમાં વીંઝાય
જલમાં દીપ તણાયો જાય.
અંધારાંના અંચલ ભેદી પંથ પાડતો જાય,
તરંગની ચંચલ અસવારી કરી તેજ મલકાય:
જલમાં દીપ તણાયો જાય.
ઘડીક નમણી જ્યોતિ નાજુક સંપુટમાં જ સમાય,
ઘડી ભવ્ય ભૂગોલખગોલે દીપશિખા લહરાય
જલમાં દીપ તણાયો જાય.
વાટ વણી ના, ના પેટાવ્યો, પોતે પરગટ થાય
નહીં મેશ કે નહીં મોગરો કેવલ તેજલ કાય
જલમાં દીપ તણાયો જાય.
~ બાલમુકુન્દ દવે
(બૃહદ્ પરિક્રમા, ૨૦૧૦, પૃ. ૩)