વરસાદમાં
એક ચહેરો ચીતરો વરસાદમાં
સામટા વહેણે તરો વરસાદમાં
આંખમીચોલી રમો, વરસી પડો
એ રીતે જળને મળો વરસાદમાં
સ્નિગ્ધતા યાદોની ભીનેવાન હો
એ ક્ષણે લપસી પડો વરસાદમાં
ધોધમારી છે સગડ એના મને
ઓ વિચારો ઉપડો વરસાદમાં
ચાલવા લાગી ગયા છે સાથમાં
તરબતર સૌ દર્પણો વરસાદમાં
ભીંજતા હાથે હવાના સ્પર્શને
આંગળીથી કોતરો વરસાદમાં
સાવ ઉલેચાઈ જાતું હોય મન
એ ઘડી શ્રીફળ ધરો વરસાદમાં
~ પારુલ મહેતા