રીના મહેતા ~ ઘાસ
ઘાસ ~ રીના મહેતા
વરસાદનું પાણી પી-પીને
પોચી પડી ગયેલી માટીવાળા
આ વિશાળ મેદાનમાં
ફેલાઈ ગયું છે ઘાસનું સામ્રાજ્ય
દૂર નજર પડે ત્યાં સુધી
ઘાસ જ ઘાસ.
અજાણી વેલીઓ એકમેકને વીંટળાઇ
રચી દે છે લીલી ટેકરી
ને એની પાછળ
ડહોળા પાણીમાં ઊભેલું કાળું ડુક્કર
જોતાં જોતાં
મારી નજર પડે તે પહેલાં જ એક ધોળું પંખી
લીલાશ વચાળે સફેદ લીટી ચીતરતું
ઊંચે ઊડી જાય છે
ને અગાસીનો દાદર ચઢી
ઘાસ જોવા ઊભેલી હું પણ
મને લાગું છું
ઊંચું માથું કરી આકાશે જોતું ઘાસ.
~ રીના મહેતા
લીલાછમ ઘાસની ભીનાશ અને નમણાશ લઈને આવેલું એક અછાંદસ… ચોમાસા પછી તરત ઊગી નીકળેલા ઘાસને જોવાનું આહ્લાદક લાગે પણ એની સાથે ઘાસ બની ગયાનું ફિલ થવું એ તો અદભૂત…. રીના મહેતા પોતાના નિવેદનમાં લખે છે, ‘વર્ષોથી આ કવિતાઓ મારી ડાયરીમાં કેદ હતી. મારી અનુભૂતિ, કોઈ અંગત વસ્તુ જેવી…….. જે ક્ષણ કવિતા જેવી મળે, મારો હાથ મિલાવે, મને આલિંગનમાં લે, હું એમાં ઓગળું એટલે બસ – એ કવિતા… એમની કવિતાઓમાંથી પસાર થતાં આ અનુભૂતિ પમાય છે.
OP 15.9.22
આભાર
16-09-2022
આભાર બકુલેશભાઈ, જિતેન્દ્રભાઈ, મેવાડાજી, છબીલભાઈ અને સરલાબેન
‘કાવ્યવિશ્વ’ના સૌ મુલાકાતીઓનો આભાર
Sarla Sutaria
16-09-2022
ઘાસ જોતા જોતા ઘાસ થઈ ગયાની લાગણી જાગી, જાણે કે પ્રકૃતિ સાથે એકરૂપ થઈ ગયા! વાહ રીનાબેન, ખૂબ સુંદર રચના 👌
છબીલભાઈ ત્રિવેદી
15-09-2022
ખુબજ સરસ અછાંદશ કાવ્ય ખરેખર ઘાસ સાથે નુ તાદાત્મ્ય અદભુત અભિનંદન આભાર લતાબેન
સાજ મેવાડા
15-09-2022
પ્રકૃતિ સાથે એકરુપતા કવિ જ સાધી શકે, સરસ.
Jitendra m joshi
15-09-2022
વાહ ખૂબ ગમ્યું
Jitendra m joshi
15-09-2022
વાહ ખૂબ ગમ્યું
BAKULESH DESAI
15-09-2022
વાહ..રીના…બહુ સરસ…વર્ષગાંઠ નિમિત્તે પણ મારી અનેક શુભેચ્છાઓ.
પ્રતિભાવો