🥀🥀
અમે તો તત્ત્વની સાથેના તાલ્લુકાત છીએ
અમે અમારાપણા અંગે અલ્પજ્ઞાત છીએ.
અમે સુગંધનો સોના પે દ્રષ્ટિપાત છીએ,
ધરો જો મૂર્તિને ચરણે તો પારિજાત છીએ.
ફળે જો સ્વપ્ન તો ઝળહળ અમે પ્રભાત છીએ,
તૂટે જો સ્વપ્ન તો ફૂલોનો અશ્રુપાત છીએ.
અમે ફલાણા ફલાણા નથી, ફલાણા નથી,
અમે તો જે છીએ તેવા જ જન્મજાત છીએ !
છે વ્યર્થ શોધ અમારી સળંગ હસ્તીની,
અમે આ વિશ્વમાં કેવળ પ્રસંગોપાત છીએ.
સમુદ્રમોજું ધસે ત્યાં સુધી તો ક્ષેમકુશળ,
અમે તો રેત પે ચીતરેલી રમ્ય ભાત છીએ !
યમુના હો કે હો દરિયો થઈ જશે રસ્તો,
અમે પ્રભુનાં ચરણ પરનો પક્ષપાત છીએ.
~ ભગવતીકુમાર શર્મા
🥀🥀
અશબ્દ વાવ છું-પડઘાથી ગૂંગળાઈ જઈશ,
ખમો હે વર્તુળો, પથ્થરથી હું ઘવાઈ જઈશ.
કરો મને તમે આજ સિન્દૂરી થાપા,
હું પાળિયો છું- પછી ધૂળથી છવાઈ જઈશ.
નથી હું રાતનો ઓથાર કે બહુ પીડું,
પ્રભાતકાળનું સ્વપ્ન છું, હું ભુલાઈ જઈશ.
હું ચૈત્ર છું, મને ઝંખો નહીં અષાઢરૂપે,
ગગનથી નીચે વરસતામાં હું સુકાઈ જઈશ.
લખું છું નામ તમારું હથેળીમાં આજે,
ને હિમખંડથી, સંભવ છે, હું ગળાઈ જઈશ.
સમયના જળનો આ જન્માન્તરો જૂનો ભરડો,
નદીકિનારાની ભેખડ છું હું -ઘસાઈ જઈશ.
~ ભગવતીકુમાર શર્મા
🥀🥀
અક્ષરબક્ષર, કાગળબાગળ, શબ્દોબબ્દો,
પરપોટેબરપોટે ક્યાંથી દરિયોબરિયો ?
કલમબલમ ને ગઝલબઝલ સૌ અગડમ બગડમ,
અર્થબર્થ સૌ વ્યર્થ, ભાવ તો ડોબોબોબો.
માઈકબાઈક ને અચ્છાબચ્છા, તાળીબાળી,
ગો ટુ હેલ આ કીર્તિબીર્તિ મોભોબોભો.
ટ્રાફિકબ્રાફિક, હોર્નબોર્ન ને સિગ્નલબિગ્નલ,
ઈસુબિસુનાં ઘેટાંને પર જડેબડે નહી રસ્તોબસ્તો.
સૂરજબૂરજ ને કિરણબિરણ સૌ અટકાયતમાં,
ચકમકબકમકથી પડશે નહિ તડકોબડકો.
ચશ્માબશ્મા કાચબાચમાં તિરાડ ત્રણસો,
વાંકોચૂકો, ભાંગ્યોતૂટ્યો ચહેરોબહેરો.
શ્વાસબાસમાં વાસ ભૂંજાતા માંસની આવે,
સમયબમયનો ખાધોબાધો ફટકોબટકો.
~ ભગવતીકુમાર શર્મા