હેમંત દેસાઈ ~ આજ મન

🥀🥀

આજ  મન  મોરલીમાં માઢ  નહીં  છેડું;
હાં જોઉં હવે,
કહાન  મને મથુરાથી મોકલે  છે તેડું?

ઢોલ ચંગ વાગે છે  પગલાંમાં  પ્રીતમના
જમુનામાં ઘુમરાતી ઝંખના અધૂરી.
શરમાતી પૂનમને સહિયર, મેં સાચવી છે
અત્તરિયા અંતરમાં પૂરી;
આભ   મહીં  ઊગ્યા  વૈશાખને   હું  વેડું;
કે કહાન  મને મથુરાથી મોકલે છે તેડું!

ગીત મહીં ઘૂટું કદંબને, આ કલકલતી
કુંજોને આંખડિયે આંજું,
પગદંડી કમખામાં બાંધું ને વનરાવન
ઓઢી લઈ ઘૂંઘટમાં લાજું;
ઘાટે  અધરાતના હું  અજવાળું  બેડું!
હાં કહાન મને મથુરાથી મોકલે તેડું!

~ હેમંત દેસાઈ (27.3.1934-2011)  

કાવ્યસંગ્રહ : ‘ઇંગિત’ અને ‘સોનલમૃગ’

વિવેચનસંગ્રહ : ‘કવિતાની સમજ’