જયશ્રી મર્ચન્ટ ~ આ તું * Jayshree Marchant

🥀 🥀

હું અને દરિયો….!

આ તું, આ સ્નિગ્ધ ક્ષણોના પહાડ ને આ હું અને દરિયો!
આ નયનનું ગગન આ કાજળના વાદળ ને હું અને દરિયો!

આ તારી હસ્તરેખા,  ને આ મારા ખાલી હાથ  ને હું અને દરિયો!
આ તારા હાથોની મહેંદી, મારું રંગહીન નસીબ ને હું અને દરિયો!

આ તારા કેશ, આ ચમેલીની તરંગી સુગંધ ને હું અને દરિયો!
આ તારા સ્પર્શની વાછટ, આ અધરોની ઘટા સઘન ને હું અને દરિયો!

આ પીગળતું હવાનું મીણ, આ ધુમ્મસિયા શ્વાસ ને હું અને દરિયો!
આ રોમરોમ પ્રત્યક્ષ તું, ને આ અફાટ તરસનું રણ ને હું અને દરિયો!

આ તું, આ રેશમી રાત, આ સરકતું ગવન, ને આ હું અને દરિયો!
આ વણથંભી સફર, આ પ્રતીક્ષા જન્મોની, આ તું , આ હું અને દરિયો!

~ જયશ્રી વિનુ મરચંટ

આ ગીતની ઓડિયો ક્લિપ માણો.