🌸
*ભૂલી ગયો છે*
ગરબડ ‘ને ગોટાળામાંથી
બહાર નીકળવું ભૂલી ગયો છે
માણસ ધોળા-કાળામાંથી
બહાર નીકળવું ભૂલી ગયો છે
ગલી ગલીનું બચ્ચેબચ્ચું
પોપટ પોપટ કહી પજવે છે
કોઇ બિચારો માળામાંથી
બ્હાર નીકળવું ભૂલી ગયો છે
ઘરથી મંદિર, મંદિરથી ઘર;
સર્કિટ જેવું જીવ્યા કરે છે
એ માણસ કુંડાળામાંથી
બહાર નીકળવું ભૂલી ગયો છે
રાતું – પીળું ગાતા એક
ફકીરનું નિદાન થયું કે –
ગુલમ્હોર – ગરમાળામાંથી
બહાર નીકળવું ભૂલી ગયો છે
જોશી-જાદૂગરના ચરણે
પરખ-પાસવર્ડ શોધે છે, એ-
ભીતર ભીડ્યા તાળામાંથી
બહાર નીકળવું ભૂલી ગયો છે
નથી જવાતું ઉપર કે ના
પાછો નીચે ફરી શકે છે
વિકટ કોઇ વચગાળામાંથી
બહાર નીકળવું ભૂલી ગયો છે
પદ-પ્રતિષ્ઠા, જ્ઞાન-ગરથના
સામે પલ્લે ગઝલ મૂકી, તું
સમજણ નામે શાળામાંથી
બહાર નીકળવું ભૂલી ગયો છે
ખબરદાર, આ ચેતવણી છે :
સ્હેજે ના અનુસરશો એને
સંજુ, સંજુ વાળામાંથી
બહાર નીકળવું ભૂલી ગયો છે
~ સંજુ વાળા
મશીન જેવું જીવન જીવતા માનવીની કથા….. જીવન જીવવાનો આનંદ ખોઈ બેઠા માણસની વ્યથા….. કેમ જીવવું ? – નો જવાબ ભૂલી ગયેલા ઈન્સાનની કહાની….. સ્વાર્થ ખાતર તમામ નીતિ-નિયમો નેવે મૂકી ચૂકેલા આદમીની વાર્તા……
જુઓ કવિ પરિચય
જન્મ દિવસની શુભેચ્છા પાઠવું છું.
ખુબ સરસ રચનાઓ 👌🏻👌🏻👌🏻
પ્રિય કવિશ્રી સંજુવાળાની બંને ગઝલો ઉત્તમ ! કવિશ્રીને જન્મદિવસની હાર્દિક શુભેચ્છાઓ
પ્રફુલ્લ પંડ્યા
૧૧ જુલાઈ ના અંક માં કવિ શ્રી સંજુ વાળા ની ઉતમોતમ ગઝલો માણવાની મજા આવી. બધી જ સંઘેડાઉતાર. આભાર. અહીંયા આવ્યા ત્યારે એમને સાંભળ્યા છે. આભાર કાવ્ય વિશ્વ
ખૂબ જ ઉત્કૃષ્ટ ભાવની બંને ગઝલો. બીબાં ઢાળ જિંદગી જીવતો માનવી.
વિશિષ્ટ ભાષા પ્રયોગો તથા અલગ લહેકો લઈ આવતી મનમોહક ગઝલો