કેવા છે શ્રી રામ?
વસે કોઈના હૈયામાં ને કરે કોઈનું કામ,
આબેહૂબ તો કેમ ચીતરવા, કેવા છે શ્રી રામ?
દાતરડાના હાથે ઉછરે અભાગણીનો છોરો,
પણ કોલેજે જાતાં લાગે ડોશીનો ડંગોરો,
બારોબાર જ ફી ભરતા કોઈ શેઠ નામ ઘનશ્યામ.
આબેહૂબ તો કેમ ચીતરવા…
સ્વરૂપનાં તો દર્શન દુર્લભ, રૂપ ઘણાં છે જોયાં,
ફરી ઝૂલતાં થયાં જ છે ભૈ અટકી ગયેલ ખોયાં,
શ્વેત-વસ્ત્રધર દવા આપતા લઈ રામનું નામ.
આબેહૂબ તો કેમ ચીતરવા…
આફત આવે મોટી ત્યારે રામ રજા પર લાગે,
થાય નિરાશા મોટી ત્યાં કોઈ પરદુઃખભંજક જાગે,
પંખાવાળી પવનપાવડી ઊતરે કોઈ ગામ.
આબેહૂબ તો કેમ ચીતરવા…
હિસાબ જેનો બાકી, એની હાટે ના કોઈ જાતાં,
જમા કર્મફળ જેનાં, એનાં બોર બધાં વેચાતાં,
નાનીમોટી બોણી રૂપે એ મોકલતા હામ.
આબેહૂબ તો કેમ ચીતરવા…
~ મધુસુદન પટેલ ‘મધુ’
અયોધ્યા નગરીમાં ભગવાન શ્રીરામ પ્રાગટ્યને શત શત વંદન
આભાર લતાબેન
જય સીયારામ
બન્ને સર્જકની રચના ખૂબ સરસ..
જય શ્રી રામ…
આભાર લતાબેન 🙏 હરિ ઓમ 🙏
જય સીયારામ
ખૂબ જ સરસ રચનાઓ, જય શ્રી રામ.
સરસ રચનાઓ.