તળાવ
દીધું નામ તળાવનું,
નવ દીધું ટીપુંક નીર.
ખાલીપાનો અહેસાસ આપતાં
કાગ-બગલાં તળને ઠોલે,
મયણાનો આભાસ ઘડીકમાં
ચાંચમાં પકડી ખોલે;
તરસ ગામની આવે અહીંયા
લૂનું પહેરી શરીર
નવ દીધું ટીપુંક નીર.
ઉપર આભ અફાટ દીધું,
નહિ વાદળની આવનજાવન,
મોસમ કેવી, કેવા આળન્ગ
શું અષાઢ, શું શ્રાવણ?
નામ તળાવનું શું રે દીધું,
દીધી નામની પીર!
નવ દીધું ટીપુંક નીર.
~ ધીરેન્દ્ર મહેતા
કવિને જન્મદિને સ્નેહવંદના
બંને રચનાઓ સરસ. કવિશ્રીને જન્મદિવસ પર સ્નેહકામનાઓ…