કરસનદાસ લુહાર ~ બે કાવ્યો * Karsandas Luhar
એક ટેકરી
આખા ડિલે ઊઠી આવ્યા જળના ઝળહળ સૉળ,
એક ટેકરી પહેલુંવહેલું નાહી માથાબોળ… !
સાવ અચાનક ચોમાસાએ કર્યો કાનમાં સાદ…
અને પછી તો ઝરમર ઝરમર કંકુનો વરસાદ !
દસે દિશાઓ કેસૂડાંની થઈ ગઈ રાતીચોળ
એક ટેકરી પહેલુંવહેલું નાહી માથાબોળ… !
ભીનો મઘમઘ મૂંઝારો ને પરપોટાતી ભીંત,
રૂંવેરૂંવે રણઝણ રણઝણ મેઘધનુનાં ગીત
શ્વાસોચ્છ્વાસે છલ્લક કુમકુમ કેસરિયાળી છૉળ,
એક ટેકરી પહેલુંવહેલું નાહી માથાબોળ… !
~ કરસનદાસ લુહાર 12.8.1942
કવિના જન્મદિને સ્મૃતિવંદના
એક લીલા પાંદ પર
એક લીલા પાંદ પર તેં વહાલ વરસાવ્યું હશે !
એ પછી આંગણ સુધી જંગલ ધસી આવ્યું હશે
આંકીનો અંધાર મારો સૌમ્ય હરિયાળો થયો
તુલસી-કયારે કોડિયું તે હમણાં પ્રગટાવ્યું હશે!
જે જગાથી આપણે લઈને તરસ છૂટાં પડયાં
એ જગા જોવા પછી કોઈ ઝરણ આવ્યું હશે !
ચાર અક્ષર જેટલું અંતર સહેવાયું નહીં
એટલે તે છૂંદણામાં નામ ત્રોફાવ્યું હશે
મારું નિર્જળ શહેર આખું પાણીપાણી છે હવે
પત્રમાં સરિયામ ચોમાસુ તેં ચિતરાવ્યું હશે!
~ કરસનદાસ લુહાર 12.8.1942
કવિના જન્મદિને સ્મૃતિવંદના
‘ એક ટેકરી ‘ ગીત શબ્દચયન અને ભાવાભિવ્યક્તિ ની દૃષ્ટિએ આસ્વાદ્ય બન્યું છે.
‘એક લીલા પાંદ ‘ કાવ્ય પણ ગમ્યું.કવિને વંદન.
કવિ શ્રી ને સ્મ્રુતિવંદન કાવ્યો ખુબ ગમ્યા