🔆યામિની વ્યાસ ~ જાદુ🔆 -

જાદુ શું કીધો ગરમાળે !
ટહુકા બેઠા ડાળે ડાળે.

ક્ષણ ક્ષણનું આ વસ્ત્ર સમયનું,
વણતું કોઈ કબીરની સાળે.

વીત્યાં વર્ષો જાણે ઝૂલે,
કરોળિયાના જાળે જાળે.

પાંદડીઓ ઝાકળ પીવાને
સૂરજના કિરણોને ગાળે.

બાળક રડતું ‘મા.. મા..’ બોલ્યું,
મેં જોયું હૈયાની ફાળે.

આવ ગઝલ, તારું સ્વાગત છે,
કોઈ તને મળવાનું ટાળે ?

~ યામિની વ્યાસ

ટૂંકી બહરની મજાની ગઝલ. દરેક શેર જીવંત. ફરી ફરીને વાંચવી ગમે તેવી ગઝલ.

🥀વિશેષ : પ્રદીપ શેઠ, ભીખુભાઈ કપોડિયા, લક્ષ્મી પટેલ ‘શબનમ’🥀

ક્ષણિકાઓ

🔆યામિની વ્યાસ ~ જાદુ🔆