🔆અશરફ ડબાવાલા ~ સફરજનની મીઠી🔆 -

સફરજનની મીઠી ફસલ આવશે,
ને આદમની પાછી નસલ આવશે.

વિચારો વટાવીને આગળ જજો,
ન કાપી શકો એ મજલ આવશે.

નમાવે જો મસ્તક તું કાગળ ઉપર,
શબદના લિબાસે કતલ આવશે.

સમાધિમાં ઊંડે ને ઊંડે જશું,
પછી કોઈ આંખો તરલ આવશે.

કદી સાચનો કિલ્લો તોડી જવા,
ધરમની ધજાની નકલ આવશે.

સજાને ક્ષમાની વચોવચ હશું,
ને ઇન્સાફ તારી અદલ આવશે.

આ ડગમગતા શ્વાસોનો ટેકો થવા,
મરણ આવશે તે અટલ આવશે. ~ અશરફ ડબાવાલા

વિચારતા કરી મૂકે એવી ગઝલ.

કવિ કહે છે, ‘વિચારોને વટાવીને આગળ જજો, ન કાપી શકો એ મજલ આવશે.’ કવિએ ભલે વિચારોને વટાવી જવાનું લખ્યું પણ હકીકતે વિચારોને વળોટવા લગભગ અશક્ય છે. વિચારોનો માર્ગ અનંત કહી શકાય. વિચારોને વટાવી શકે એ ધ્યાનસ્થ સંત કે ઋષિ મળવા મુશ્કેલ.

શું શું આવે અને ક્યારે એની કવિ અવધારણા કરી રહ્યા છે.

કવિતાને શરણે ગયા પછી શબ્દ તમારો જીવ લઈ લે એવું બને. એક તો સમાધિ લાગવી કઠિન છે પણ પ્રયત્નો સફળતા સુધી જઈ રહ્યા હોય ત્યારે કોઇની ભીની આંખ ફરીને દેહભાનમાં ડૂબાડી દે!

અને આવું આવું…. કવિના કલ્પનોનો અંત ક્યાં આવે? હા, મરણ એ જ સર્વે સમસ્યાઓનો અંત કે તમામ સમસ્યાઓનો અંત .

🥀દિનવિશેષ: ગુણવંત વ્યાસ, કાનજી પટેલ, જીવણ ઠાકોર કવિ🥀