🔆હર્ષ બ્રહ્મભટ્ટ ~ એમ ના સમજો🔆

એમ ના સમજો નયન સધ્ધર નથી,
રાહ જોવાની હવે ઉંમર નથી!

એમને પણ એ કરે છે દંડવત્
જેમના પ્રત્યે કશો આદર નથી.

દ્વાર સુંદર જોઈને ઈર્ષ્યા ન કર,
એના દરવાજાની પાછળ ઘર નથી!

લોહી પડછાયાઓનું ઊકળી ઊઠ્યું,
વાદળે પૂછ્યું, ‘સૂરજ કાયર નથી?”

એ ગમે ત્યારે ગબડવાનો જ છે,
એના રસ્તામાં કોઈ ઠોકર નથી.

હું તો આ સમજણથી માલામાલ છું,
છે બધું પણ આપણી ખાતર નથી.

કેટલું વાતાવરણ પાવન છે ‘હર્ષ’,
આ નગરમાં સંત—પેગમ્બર નથી!

~ હર્ષ બ્રહ્મભટ્ટ

બધા જ શેર મજાનાં પણ આ વિશેષ ગમ્યો.

દ્વાર સુંદર જોઈને ઈર્ષ્યા ન કર, / એના દરવાજાની પાછળ ઘર નથી!

આમ જુઓ તો જ્યાં ઘર હોય ત્યાં જ દ્વાર હોય ! પણ અહીં કવિએ સરસ ઇંગિત કર્યું છે, અને એ છે ‘ઘર’ અને મકાન વચ્ચેનો ભેદ!

તો અહીં બની બેઠેલા સંતો પર જે વ્યંગ્ય છે એ જુઓ

કેટલું વાતાવરણ પાવન છે ‘હર્ષ’, / આ નગરમાં સંત—પેગમ્બર નથી!

‘કાવ્યવિશ્વ’ પર આવકાર છે.

‘સહર્ષ’ * સં. વિનોદ જોશી : કવિ શ્રી હર્ષ બ્રહ્મભટ્ટની ચૂંટેલી ગઝલો * નવભારત 2026  

🥀દિન વિશેષ : રાસબિહારી દેસાઇ🥀

🙏આપની પસંદના કવિ કોણ છે? ‘Search’માં એમનું નામ લખો! અને વાંચો એમની કવિતાઓ. એમાં આપ પોતે પણ હોઈ શકો.🙏

🙏આપને કવિઓ વિશે જાણવામાં રસ છે? જુઓ વિભાગ ‘સર્જક’.  મોબાઇલના ઉપરના જમણે ખૂણે આવેલી આડી ત્રણ લાઇન ટચ કરો અને ખુલશે વિભાગો.🙏 

મુઝે સજા દો