🔆ઉદયન ઠક્કર ~ પપ્પા🔆

*પપ્પા, સંગીતમાં દાદા છે!*

તાનસેનથી પણ જ્યાદા છે
પપ્પા, સંગીતમાં દાદા છે!
ધુમ્મક ધૂમ, ધુમ્મક ધૂમ

લલકારે છે લઈને વાજું
ગીત સુરીલું, તાજું માજું
સૂર સાંભળો લીસા-લીસા
સા-રે-ગ-મ-પ-ધ-નિ-સા
ધુમ્મક ધૂમ, ધુમ્મક ધૂમ

મારા પપ્પા રોજ પરોઢે
ગાતા પંખીઓની જોડે
સુબહ-સુબહ હું આંખો ખોલું
‘સુબહાનલ્લા’ – જોરથી બોલું
ધુમ્મક ધૂમ, ધુમ્મક ધૂમ

મને કહે કે આવો બબલા
લાવો પેટી, પાવો, તબલાં
હું તો ફક્ત ચડાવી બાંયો
ઝીંકે રાખું બાંયો-દાંયો
ધુમ્મક ધૂમ- ધુમ્મક ધૂમ

નાદિર દીન્તા નીતા નારે
તિરકિટ ધુમ, તન્ની તાથા રે…
ઐયૈયો, આ તબલાંઓ તો
કેવું મદ્રાસી ગાતા રે!
ધુમ્મક ધૂમ, ધુમ્મક ધૂમ

અવાજના ઊજળા આરસથી
પપ્પા તાજમહાલ બનાવે
હું તો ઔરંગઝેબ, મને તો
માત્ર આટલું સમજમાં આવે :
ધુમ્મક ધૂમ, ધુમ્મક ધૂમ

~ ઉદયન ઠક્કર

કેવું મજાનું બાળગીત !!

🙏આપની પસંદના કવિ કોણ છે? ‘Search’માં એમનું નામ લખો! અને વાંચો એમની કવિતાઓ. એમાં આપ પોતે પણ હોઈ શકો.🙏

🙏આપને કવિઓ વિશે જાણવામાં રસ છે? જુઓ વિભાગ ‘સર્જક’.  મોબાઇલના ઉપરના જમણે ખૂણે આવેલી આડી ત્રણ લાઇન ટચ કરો અને ખુલશે વિભાગો.🙏 

@@

કેન્વાસ પર ઉછળતાં મોજાં