🔆સ્વાતિ મેઢ ~ શાંત આ રાત્રિ🔆

શાંત આ રાત્રિ મહીં આવો ગહન રવ કાં સુણું?
છે ભરશિયાળુ રાતડી વાદળની ગડગડ કાં સુણું?

રે માંડ તો સૂવા મળ્યું ચિંતા મૂકી ઘરબારની,
રેશમ રજાઈ ઓઢતાં આવો ઊંચો સ્વર કાં સુણું?

છે નસકોરાંનો નાદ આ સંભળાય છે બહુ જોરથી,
બંધ કરવા મારું ટપલી કે ઝીણી ચૂંટી ખણું?

દિવસ આખો કચકચો સુણતી રહું વરરાજની,
રાતે ય મૂંગા ના રહે? બેસૂર સંગીત શીદ સુણું?

ચાર ફેરા છે ફર્યા, સાતેય ડગલાં માંડીયા,
તો શું થયું? શા કારણે હું રાતમાં ઘેટાં ગણું?

જાગી ગઈ છે આજ નારી, ઊંઘ બસ ઊડી ગઈ,
છું નિશ્ચયી,દ્રઢનિશ્ચયી આ ગડડ ગડગડ નહીં સુણું.

ઇકવોલિટીનો છે સમય ના સહીશ જુલમો એકલી,
લૈ લઉં ડિસિશન બસ હવે, આ પાર કે તે પારનું

નાખીશ કાને પૂમડા, માથે દુપટ્ટો લૈ વીંટીશ,
બેવડી બેસૂર તરજ ના એ સુણે ના હું સુણું.!

~ સ્વાતિ મેઢ            

દિવ્ય ભાસ્કર @ કાવ્યસેતુ 361 @ 25 ડિસેમ્બર 2018 * લતા હિરાણી

*નસકોરાં પાર્ટી*

આ સમય મોજમજાના પાર્ટીનો છે. આજે હાસ્યકવિતા. એક તો હાસ્યમાં સ્ત્રીઓ ઓછી અને એમાંય હાસ્ય કવિતા ! ભાગ્યે જ મળે ! સ્વાતિ મેઢ આ દિશામાં થોડું થોડું કામ કર્યે જાય છે.

લો ત્યારે, કવિતા તો તમે પહેલા જ વાંચી લીધી છે. વિષયમાં સદાસર્વદા ચાલ્યો આવતો અને ક્યારેય નહીં ખતમ થનારો એ જ નસકોરાનો પ્રોબ્લેમ ! કદાચ ભવિષ્યમાં એના ઉપાયમાં ડોકટરો કોઈક સર્જરી શોધી કાઢશે ખરા ! (આજે પણ હોય તો મને ખબર નથી, માફ કરજો) સર્જરી એટલા માટે કે દવામાં તો ડોકટરો કમાય શું ? સર્જરી કરે તો બિચારા ડોકટરોને યે પાર્ટીઓ વધે ! જુઓ ને ! હવે નોર્મલ ડિલિવરી કેટલી ઓછી થાય છે, જ્યાં જુઓ ત્યાં સીઝેરીયન ! અને ડોકટરો પાસે એના માટે નક્કર કારણોની અછત હોય ખરી ?

નસકોરાંપાર્ટી પણ એક જાતની મહેફિલ જ છે ને ? સ્વાતિબહેન જેવી મુશ્કેલી અનેક બહેનોને હશે. મોટાભાગે તો સ્ત્રીઓ ઉદાર હોય છે. પતિની તમામ કુટેવો એ ચલાવી લે છે કે આંખ આડા કાન કરે છે. હવે આમાં મુશ્કેલી કાનની જ અને કાન આડે તો આંખ થાય નહી ! કાન આડે કશું આવી શકે નહીં. આંખ આડે કાન કેમ આવી શકતા હશે એ ય વિચારવા જેવું ખરું ! ભલેને એ રૂઢિપ્રયોગ રહ્યો. રૂઢિપ્રયોગમાં આંખ ને કાનને જ કેમ લાવ્યા ? બાજુબાજુમાં છે એટલે ? આ બધુ સંશોધનનો વિષય કહેવાય અથવા  હાસ્યકવિતા કે લેખ માટે એક બીજો વિષય બની શકે ખરો !

જે હોય તે પણ રોજ રાત્રે બાજુમાં સૂતેલા પતિદેવના નસકોરાં સાંભળવા જેવો જુલમ આજની જાગી ગયેલી નારી ન ખમી શકે. હવે સમાનતાનો વાયરો ફૂંકાયો છે એટલે આ અન્યાય સાંખી ન શકાય. સમાનતાના ધોરણે પતિદેવ એને કહી શકે કે કાલથી તુંય નસકોરાં બોલાવજે જા…. પણ એય થોડું પોતાની મરજીથી થાય છે ! આ તો બાજી આખી કુદરતના હાથમાં. નસકોરાં બોલે તો બોલે ને ન બોલે તો ન બોલે !  છતાંય પતિદેવનો વિરોધ કરી જ શકાય. એમને જગાડી ચૂપ રહેવા જોરદાર ચીમકી આપી શકાય. પતિ મહાશય બિચારા જાગીને ‘સોરી’ કહી ફરી સૂઈ જાય પણ ફરી સ્પીકર ચાલુ થવાનું જ ! એક જ ઉપાય છે. કાનમાં ખોસો રૂના પૂમડાં ને માથે રાણી લક્ષ્મીબાઈના ફેંટાની જેમ બાંધો દુપટ્ટો ! પછી ચડો ઊંઘના ઘોડે ! રણ જીત્યા તો જીત્યા બાકી એ પૂમડાને કે દુપટ્ટાનેય આરપાર વીંધીને થોડો અવાજ આવે તો પછી હાર સ્વીકારી લેવા સિવાય બીજું શું થઈ શકે !  

🌸દિન વિશેષ : પ્રીતિ સેનગુપ્તા, કાજલ કાંજિયા, સ્વાતિ મેઢ, બાલાશંકર કંથારીયા🌸

🙏 કવિઓના જન્મદિવસોનો વિભાગ ‘વિશેષ’ જોવા માટે મોબાઇલના સૌથી ઉપરના ભાગે જમણી બાજુ ત્રણ આડી લીટી દેખાશે એને ટચ કરતાં બધા વિભાગો જોવા મળશે. જે વિભાગ જોવો હોય એને ટચ કરો.🙏

🙏આપની પસંદના કવિ કોણ છે? ‘Search’માં એમનું નામ લખો! અને વાંચો એમની કવિતાઓ. એમાં આપ પોતે પણ હોઈ શકો.🙏

🙏કાવ્યવિશ્વ’માં કવિના નામથી, કાવ્યની પ્રથમ પંક્તિથી અને વિષયથી કાવ્ય કે લેખ શોધી શકાય છે જુઓ search🙏

🙏‘કાવ્યવિશ્વ’ના વોટ્સ એપ ગ્રૂપમાં આપ જોડાઈ શકો છો.🙏

ઓમ રીંગણાયે નમ: