🔆નટવર પટેલ ~ મેં તો સખી🔆

મેં તો સખી, આજ સોળે સજ્યા શણગાર
જોઉં છું વાટ ક્યારે આવે વે’માન !…….

મારી શેરીમાં ડાબલા એના વાગ્યા
ઊંડી આંખોમાં શેરડા તબકી જાગ્યા
મેં તો સખી, નાંગરી છે નાવ મઝધાર
જોઉં છું વાટ ક્યારે આવે વે’માન !……..

એના હોંકારે પડકારે ઉંબરા ધ્રુજ્યા
થીર પગલાને મેં તો આવતા પૂજયા
મેં તો સખી, છાંડી આ મેલી મરજાદ
જોઉં છું વાટ ક્યારે આવે વે’માન !…….

મારી કાયામાં રોમ-રોમ એનો અણસાર
મારી નાડીમાં રામ-રામ ચાલે ધબકાર
મેં તો સખી ! આજ કર્યું ઊંચે પરયાણ
જોતી ‘તી વાટ ને આયું વે’માન !

~ નટવર પટેલ

દિવ્ય ભાસ્કર @ કાવ્યસેતુ 314 @  9 જાન્યુઆરી 2017 * લતા હિરાણી

અનેક સંતોએ, અનેક ભક્તોએ મૃત્યુને પ્રિયતમા કહીને વધાવ્યું છે. એક ફિલ્મી ગીતના શબ્દો પણ યાદ આવે છે, ‘મોત મહેબૂબા હૈ અપની, સાથ લેકર જાયેગી….’ જાણે એની પ્રતીક્ષામાં જ આ જન્મ વિતાવ્યો હોય ! આની પાછળનો હેતુ, હું સમજુ છું એમ, મૃત્યુની ભયાનકતાને હળવી કરવાનો જ હોઈ શકે. દરેક માનવી મોતથી ડરે છે. બધા જ જાણે છે કે મૃત્યુને કોઈ કશાથી પણ રોકી નહીં શકે. એ જ્યારે આવશે ત્યારે જવું જ પડશે. એનો કોઈ ઉપાય નથી. તેમ છતાં કોઈક પરમને પામેલા વિરલા સિવાય મૃત્યુને હસતે મુખે આવકારવાની કોઈમાં હિમ્મત નથી હોતી. સાંસારિક જીવ માટે મૃત્યુ એ અત્યંત દુખમય ઘટના છે.

શાસ્ત્રો કહે છે મૃત્યુ એ માત્ર શરીરની વિદાય છે. જૂનું કલેવર ત્યજીને આત્મા નવું સ્વરૂપ ધારણ કરે છે. સ્થૂળ દેહમાંથી સૂક્ષ્મ જગતમાં અને જો એક કક્ષા પ્રાપ્ત થઈ હોય તો પછી કારણજગતમાં એનો વાસ થાય છે. બાકી સ્થૂળથી સૂક્ષ્મ અને ફરી સ્થૂળ એ આવાગમન ચાલ્યા કરે છે. જે અધૂરી આકાંક્ષાઓ, ઇચ્છાઓ જીવ સાથે લઈને જાય એને પૂરી કરવા એ ફરી જન્મ લે. આ વાત વત્તે-ઓછે અંશે કે જુદી જુદી રીતે, અલગ અલગ પરિભાષામાં બધા જ ધર્મો સમજાવે છે અને તોયે એનો ભય યથાવત !

આ દેહ જીર્ણ થવા આવે એટલે પ્રિય સખીને વધાવવાની તૈયારી કરવા માંડવી જોઈએ કેમ કે કોઈને કોઈ રીતે એ સૂચના આવતી જાય છે. એનું સંગીત વાગવા માંડે છે. જીવનમાં જો નિયમિત રીતે પ્રભુસ્મરણ કર્યું હોય તો જ અંત  વખતે એનું નામ હોઠ પર ને હૈયે રમે અને તો એને પ્રેમથી વધાવી શકાય. આપણે સ્વર્ગમાં જ જવાના છીએ એમ માનીને ચાલીયે તો સદાચારી, પૂણ્યશાળી જીવને લેવા સ્વર્ગમાંથી વિમાન લેવા એ આપણી પારંપરિક માન્યતાને આ ગીતમાં સરસ રીતે વણી લેવામાં આવી છે. આમ હોય તો સ્વાભાવિક જ શોક શેનો ! શણગાર જ સજવાના હોય. હસીખુશી વિદાય લેવાની હોય, આપવાની હોય. 

જાણવું એક વાત છે અને જીવવું બીજી વાત છે. જે જાણીએ છીએ એને માહિતી કહી શકાય પરંતુ એને સમજીને જીવનમાં ઉતારવું, એ પ્રમાણે અમલ કરવો એ ઊંડી સમજણનું ક્ષેત્ર છે. જ્ઞાન ઘણું હોય ને સમજણનો અભાવ હોય એવા શુષ્ક જ્ઞાનનો કોઈ અર્થ નથી. થોડીક સાચી સમજણ હોય તો જ્ઞાન કે માહિતી વગર ચાલશે. શાસ્ત્રો કે ધર્મના સિદ્ધાંતો જાણવાની કોઈ જરૂર નથી. અંદરથી જે થોડુક પણ સ્ફૂરે એનો પૂરા દિલથી અમલ કરી શકાય તો પછી કશાયનો ભય ન રહે. કશી ચિંતા ન રહે કેમ કે જે થવાનું છે એ થવાનું જ છે. એને સહજભાવે અને રાજીખુશીથી સ્વીકારવાનું છે એટલે ધન્ય ધન્ય અવતાર !  
***

🥀દિન વિશેષ : રવીન્દ્રનાથ ટાગોર, પન્નાલાલ પટેલ, Robert Browning🥀 

🙏 આપનો જન્મદિન (વિભાગ વિશેષ) પણ ‘કાવ્યવિશ્વ’માં સમાવિષ્ટ છે. આપનું નામ લખો, ‘search’ માં, પોસ્ટ હાજર!🙏

🙏’કાવ્યવિશ્વ’માં મનપસંદ કવિની કવિતા મળી શકે છે, કવિનું નામ લખો ‘search’ માં, પોસ્ટ હાજર! 🙏

🙏 ‘કાવ્યવિશ્વ’માં આપ પ્રતિભાવ લખો તો આપનું નામ જરૂર લખો.🙏  

**

પ્રેમ અને સમય