🔆મિલિન્દ ગઢવી ~ હું એટલે🔆

હું એટલે સમયની રફતારની ઉદાસી,
અજવાસની અણી પર, અંધારની ઉદાસી.

કહેવાય છે કે મનની, શાપિત છે હવેલી,
ભટકે છે આજ પણ ત્યાં મરનારની ઉદાસી.

એવું નથી કે આવે અઠવાડિયાને અંતે,
ઘેરી શકે છે વચ્ચે બુધવારની ઉદાસી.

તારા બધા દિલાસા નકશાની દીવાદાંડી,
અહીંયા વમળ વમળ છે મઝધારની ઉદાસી.

હું બારણું બનીને ઉભો છું ઉંબરામાં,
ઘરની બહાર ગઈ છે ઘરબારની ઉદાસી.

તાજા ખબરમાં એ કે ચગદાઈ ગઈ અચાનક,
આ ભીડભાડ મધ્યે બે-ચારની ઉદાસી.

મારી કિતાબને પણ મારી ચિતામાં હોમો,
ઓ પાર લઈ જવી છે, આ પારની ઉદાસી.

તારાં સ્મરણની રાતે કાળાશ વિસ્તરી છે,
જોયા કરે જૂનાગઢ ગિરનારની ઉદાસી.

લ્યો શબ્દ શબ્દ થઈને કાગળમાં ઊતરી છે,
ગઢવીની આંગળીથી ગુલઝારની ઉદાસી.

~ મિલિન્દ ગઢવી

કવિ અને ઉદાસીને કોઈ જૂગજુનો નાતો છે. ઉદાસી અને સાંજને પણ એવું જ. આ સાંજનો રંગ રાત સુધી વિસ્તરે તો અંધારું પોતાની કાળાશ સાચવી ન શકે.  
મન એવી ચીજ છે જેને સુખના સ્મરણો માફક નથી આવતા. પણ દુખને એ ચોવીસ કલાક હૈયે વળગાડી ફરે! કવિની ઉદાસી ગિરનાર ઝીલે છે અને એ ગુલઝાર સુધીયે પહોંચી શકે છે!

🙏આપની પસંદના કવિ કોણ છે? ‘Search’માં એમનું નામ લખો! અને વાંચો એમની કવિતાઓ! એમાં આપ પોતે પણ હોઈ શકો!🙏

🙏 કવિઓના જન્મદિવસોનો વિભાગ ‘વિશેષ’ આપ ગમે ત્યારે જોઈ શકો છો. like, પ્રતિભાવ પણ આપી શકો છો.🙏

પપ્પુ પેરટ