🔆વિપુલ માંગરોલિયા ‘વેદાંત’~ રોજ પ્રભાતે🔆 -

રોજ પ્રભાતે લૂંટ્યું અંબર,
રાતે પાછું ગૂંથ્યું અંબર.

ખેદ નથી કે પાંખ કપાણી,
પીડા છે કે છૂટ્યું અંબર.

એ જોવા વરસી છે વર્ષા,
ક્યાંથી ક્યાંથી ફૂટ્યું અંબર?

કોણે કીધું અભિમાની છે?
જો ક્ષિતિજ પર ઝૂક્યું અંબર.

નાની અમથી વિપદા ટાણે,
લોકો કહેશે, તૂટ્યું અંબર.

ક્યાંય નથી દેખાતું વાદળ,
કોણે આજે લૂછ્યું અંબર?

~ વિપુલ માંગરોલિયા ‘વેદાંત’

‘અંબર’ની આસપાસ મંડરાતા ભાવો. કોઈ એક તત્ત્વને કેટલા વિધવિધ દૃષ્ટિકોણથી જોઈ શકાય છે, એની આવા કાવ્યોમાં મજા હોય છે. પ્રભાત આવીને આકાશમાં ભરેલો અંધકાર લૂંટી લે અને રાતે ફરી એ જ અંધકારની જાળ ગૂંથીને જાય ! આવા એક પછી એક શેર કલ્પનોની પાંખે વિહરવાનો આનંદ આપે છે.

🌸આજે જન્મદિન: રીંકું રાઠોડ, ઉસ્તાદ અલ્લારખાં🌸

🙏 આપનો જન્મદિન (વિભાગ વિશેષ) પણ ‘કાવ્યવિશ્વ’માં સમાવિષ્ટ છે. આપનું નામ લખો, ‘search’ માં, પોસ્ટ હાજર!🙏

🙏’કાવ્યવિશ્વ’માં મનપસંદ કવિની કવિતા મળી શકે છે, કવિનું નામ લખો ‘search’ માં, પોસ્ટ હાજર! 🙏