🔆ઈસુદાન ગઢવી ~ ચોમાસું કેટલું છેટું🔆

ચોમાસું કેટલું છેટું
સૈયર ઓણ, ચોમાસું કેટલુંક છેટું….?
અંદરથી કો’ક
મને રોજ રોજ પૂછે છે,
ઉનાળા કેટલાક વેઠું…?
ચોમાસું કેટલુંક છેટું….?

અષાઢી હેલીયુંના સામૈયા સારુ
મેં આંખ્યુંમાં માંડવાઓ બાંધ્યા,
કાળજામાં લાગણીના કૂણા કંસાર
મેં પહેલે ’દિ પીરસવા રાંધ્યા,
વરસાદી ઓઢણિયું પંડ્ય પર પહેરવા,
મોભારે ચઢી મન બેઠું.
ચોમાસું કેટલુંક છેટું….?

ભીની સોડમનો સૂકો દુકાળ સખી
કાયમ તે જીરવ્યો શેં જાય,
આભલામાં રોજ આખો દરિયો ઊભરાય
ને દરિયાથી વરસે છે લ્હાય,
અંતરમાં ઊઠ્યું છે એવડું તોફાન
હવે કેમ કરી બેસાડું હેઠું?
ચોમાસું કેટલુંક છેટું….?

~ ઈસુદાન ગઢવી

દિવ્ય ભાસ્કર @ કાવ્યસેતુ 299 @ 26 સપ્ટેમ્બર 2017 * લતા હિરાણી

ભીની બળતરા

આકાશમાંથી ચોમાસું વિદાય લે, વાદળાં કોરાધાકોર થઈ રુના પોલની જેમ ઊડ્યા કરે ને તોય ધરતી પર કો’કના હૈયામાં ચોમાસું અનરાધાર હિલોળા લેતું હોય એવું બને.. કદાચ કુદરતે એની કુંડળીમાં પો’રનું ચોમાસુ લખ્યું હોય પણ પ્રિયને મળવા બાવરી બનેલી વિજોગણ ત્યાં સુધી ખમી શકે એમ નથી. હથેળીમાં તરસની રેખાના ચાસ એના હૈયે ઉઝરડા પાડે છે.. એને તો ઓણ જ મળવું છે. ખાંગાં થઈને વરસતા અનરાધાર નેહમાં ઝટ પલળવું છે. કોણ જાણે કેટલાય ઉનાળા એની પાછળ વેઠી નાખ્યા. પંડ પર વરસાદી ઓઢણી ઓઢીને આંખ્યુંમાં માંડવા બંધાય ને કાળજામાં લાગણીના કંસાર રંધાય એ પ્રથમ મિલનની ઉત્સુકતાની ભરતી છે ને અંતરના તોફાનની આવડી મોટી એંધાણી છે. કોરી પાટી પર અક્ષરો પાડવાની હૈયે ઉમટેલી ઉતાવળ છે.

પરણવાની ઉંમર, વરસવાની ને ભીંજાવાની મોસમ, આ અવસ્થા લગભગ બધાના જીવનમાં આવતી હોય છે. બનાવાજોગ છે કે પરણ્યાના એકાદ બે દસકાની અંદર એવો સમય આવી જાય કે મનમાં થાય, “શું રહી જતા ‘તા આના વગર !’ પણ તોય આ અનુભવ લીધા વગર કોઇથી રહી શકાય નહીં એય એટલું જ સાચું ! અમસ્તું લગ્નને લાકડાના લાડુ કહ્યા છે ! ખાનાર પસ્તાય ને ન ખાનારેય પસ્તાય ! પણ જવા દો, શૃંગારરસની આવી સરસ કવિતા વાંચતાં કે એના વિશે લખતાં આવા વિચારો નહી કરવા જોઈએ ખરું ને !

બીજી વાત એય છે કે જીવનમાં બધા અનુભવો લઈ લેવા જોઈએ. અનુભવ લીધા વગર પસ્તાવા કરતાં અનુભવ લઈને પસ્તાવું સારું ! જીવનમાં દરેક બાબતની એના સમયે મહત્તા છે. સચ્ચાઈ એ છે કે કામઉર્જા સમગ્ર સૃષ્ટિનું ચાલકબળ છે. જેને આપણે પૂજીએ છીએ એ દેવોને એણે વધારે કનડયા છે અથવા તો મનુષ્યમાં દાખલો બેસાડવા કે પછી કામનું આધિપત્ય સ્થાપવા એ કથાઓ સર્જાઈ છે. પ્રેમ નામની શક્તિએ માનવી પાસે કલ્પના બહારના કામો કરાવ્યા છે. મોટાભાગની જબરદસ્ત સાંસારિક ઘટનાઓ પાછળ આ તત્વ કામ કરી ગયું છે. તુલસીદાસ પ્રિયતમાને મળવા માટે ઉપર ચડવામાં સાપને દોરી માની લે એ આ ઉર્જાની કમાલ છે. પૃથ્વીના જન્મથી આ તત્ત્વની કમાલ એટલી જોરદાર રહી છે. એ લખાય કે ન લખાય, એ સતત જીવાતી શક્તિ છે. એનું યોગ્ય માહાત્મ્ય સમજવામાં આવે તો સંયમ અને સમજદારીનો રસ્તો પણ ખૂલે અને પછી રામ-રહીમના ડેરાઓ ન રચાય. 

ભર્તુહરીના શૃંગારશતક  કે કાલિદાસના મેઘદૂતમથી માંડીને પ્રેમ પર લાખો-અબજો  કવિતાઓ રચાય તો પણ પ્રલયની પળ સુધી પ્રેમી એના પર નિત્ય નુતન કવિતા રચી શકે અને કવિતા જીવી શકે. સાધુ-સંતો વૈરાગ્યની ગમે એટલી કથાઓ કરે, સૃષ્ટિના અંત સુધી આ કામતત્ત્વ ઈશ્વરની જેમ અચળ અને અવિનાશી રહેવાનું  છે એ બેશક…..       

**

🌸આજે જન્મદિન: નમિતા વોરા, મનહર મોદી. મંથન ડીસાકર, પ્રભાશંકર પટ્ટણી, અયોધ્યાસિંહ ઉપાધ્યાય, હસરત જયપુરી, ગુરુ નાનક🌸

🙏 આપનો જન્મદિન (વિભાગ વિશેષ) પણ ‘કાવ્યવિશ્વ’માં સમાવિષ્ટ છે. આપનું નામ લખો, ‘search’ માં, પોસ્ટ હાજર!🙏

🙏’કાવ્યવિશ્વ’માં પસંદના કવિની કવિતા મળી શકે છે, કવિનું નામ લખો ‘search’ માં, પોસ્ટ હાજર! 🙏