🔆ચંદ્રકાન્ત અંધારિયા ~ આપે ન કો’ ઉધાર🔆

આપે ન કો’ ઉધાર, તમારા ગયા પછી,
આવે છે લેણદાર, તમારા ગયા પછી !

દરરોજ જોઉં છું હું ફિલમ ત્રીજા ખેલમાં,
ના કોઈ ટોકનાર, તમારા ગયા પછી !

તેજીમાં કાલ જે હતી મંદીમાં આવી ગઈ,
શૃંગારની બજાર, તમારા ગયા પછી !

ઘર-કામ કાજ વહેલો હું ઉઠતો’તો પણ હવે,
મોડી પડે સવાર, તમારા ગયા પછી !

‘બદમાશ’, ચોર, ગુંડા, લફંગા મળી બધા,
ઘરમાં રમે જુગાર, તમારા ગયા પછી !

~ ચંદ્રકાન્ત અંધારિયા ‘બદમાશ’

આજે પહેલી એપ્રિલ – ખુશ હૈ જમાના આજ પહલી તારીખ હૈ…. એ ગીત જરૂર યાદ આવે તો આજે એપ્રિલફૂલનોય દિવસ. એટલે આજે વિશ્વહાસ્યદિન ગણીએ તો ખોટું નહીં, શું કહો છો ?

જેમને ઉપનામ જ ‘બદમાશ’ રાખ્યું છે એવા કવિએ રચેલી આળસુ પતિની આ ગઝલ છે. (આમ તો ઘરમાં કામગરા પતિ ક્યાંય જોયા છે ? જવા દો, એ મુદ્દાને નથી છેડવો) પત્ની પિયર ગયા પછી જેને મોકળું મેદાન મળી ગયું છે એવા પતિની ગઝલ…. શુદ્ધ હાસ્ય અને શુદ્ધ કવિતા. મજા લો એની…

આજનો દિન વિશેષ : ડો. કિશોરસિંહ સોલંકી, નિનાદ અધ્યારૂ, ડો. દક્ષેશ ઠાકર, રાજીવ ભટ્ટ ‘દક્ષરાજ’, મહેશ પ્રજાપતિ, ડાહ્યાભાઇ પટેલ ’માસૂમ’,& *જયંત કોઠારી *બાલાશંકર  કંથારીયા, *કૈલાસ વાજપેઈ (*અવસાન દિન)

🙏 નોંધ: કવિઓના જન્મદિવસોનો વિભાગ ‘વિશેષ’ આપ ગમે ત્યારે જોઈ શકો છો. like, પ્રતિભાવ પણ આપી શકો છો. આભાર. આપના નામથી ‘seach’ આપો.🙏