🥀હેમંત દેસાઈ ~ પડી જવાનું🥀 -

પડી જવાનું – ઊભા થવાનું, ભાન હોવું – માણસ હોવું,
ગમેતેમના ગબડ્યાનું વરદાન હોવું – માણસ હોવું.

ચડતા શિખરે, પડતા નીચે, પડતા ખીણમાં, ચડતા ઊંચે,
મચ્યા રહ્યાનું લગાતાર બસ, ધ્યાન હોવું – માણસ હોવું.

ઈટ્ટાકિટ્ટા કર્યે જવાનાં, ખર્યે જવાનાં ખોખો ખેલી,
મોટેરા મનસૂબાથી બળવાન હોવું- માણસ હોવું.

ચરણ રુકે ત્યાં સ્વાગત ઝીલતાં દુનિયામાં ફૂલ્યાં ફરવાનું,
પોતાના ઘરમાં જાણે મહેમાન હોવું – માણસ હોવું.

મહામોલનાં શિર દઈ દેતાં હસતાં હસતાં ક્ષણમાં તેને
સસ્તાં સસ્તાં જીવનનું અભિમાન હોવું – માણસ હોવું.

સમજણની સિધ્ધિના વડલા વિસ્તાર્યા નિત કરવા પડતા,
તોય વખત પર નિરાધાર નાદાન હોવું – માણસ હોવું.

ખૂબીખામીના જુદા તોલથી સ્વજનપરાયાં જોખ્યાં કરવાં,
ઢળ્યાં અહીં કે તહીં, બધે વેરાન હોવું – માણસ હોવું.

હારજીતના ભેદ ભુલાવે એવા યુધ્ધે હોમાયાંનું,
મળે તેમના જીવ્યાનું સન્માન હોવું- માણસ હોવું.

~ હેમંત દેસાઈ (27.3.1934-2.10.2011)

‘ઇંગિત’ કાવ્યસંગ્રહ 1961

🙏🏻માફ કરશો મિત્રો, ‘કાવ્યવિશ્વ’માં કાવ્યસંગ્રહો લેવાના બંધ કર્યા છે. આભાર.🙏🏻

હરીશ દાસાણી.મુંબઈ

27/03/2026 at 7:25 am

માણસ હોવું એ વરદાન પીડાનું

છબીલભાઈ ત્રિવેદી

27/03/2026 at 9:14 am

પોતાના ઘર મા મહેમાન હોવુ ખુબ સરસ રચના સ્મ્રુતિવંદન

'સાજ' મેવાડા

27/03/2026 at 12:22 pm

ખૂબ સરસ એક વિચારણીય રચના.

Lalit Trivedi

27/03/2026 at 8:01 pm

સરસ ગઝલ. ગઝલની સાથોસાથ અન્ય પ્રકારો પણ એમની વિશિષ્ઠ ઓળખ. કાવ્યો વિશેનું એમનું એક પુસ્તક તો textbook ગણાય જ છે. આદરણીય કવિને વંદન

Kavyavishva

27/03/2026 at 10:13 pm

પ્રતિભાવ લખનારા મિત્રોનો ઘણો ઘણો આભાર.
‘કાવ્યવિશ્વ’ની મુલાકાત લેનારા મિત્રોનો પણ એટલો જ આભાર.

🥀હેમંત દેસાઈ ~ પડી જવાનું🥀