🥀પરબતકુમાર નાયી ~ અડધો ફાગણ🥀 -

*ફાગણનું_ગીત*

અડધો ફાગણ અમે આંખોમાં આંજ્યો ને અડધાને પાનીમાં પેર્યો.
વરણાગી વાયરાએ આપ્યો જે કોલ, એને કમખાની કોરમાં ઊછેર્યો.
મોરપીંછ સુંઘીએ તો ફૂલ બની જાતું ને પાણીને અડીએ તો અત્તર.
આભલાંની સામેય બેસવું કેમ કરી?
સોળ વાનાં માગે આ સત્તર!

અડધો અણસાર કર્યો પાંપણની પલકારે અડધાને હોઠ વડે વેર્યો.
ફાગણમાં ફૂલોથી છેટો રહીને, છેલ છલકે તો છલક્યો શા કામનો ?
ગાલ ને ગુલાલ વચ્ચે બાંધે શું વાડ? અરે આવો મીંઢો તે કયા ગામનો!
અડધો ખોબો લઈ તું ઉંબર ઊભો, અમે કેસૂડો ફળિયે ખંખેર્યો.

~ પરબતકુમાર નાયી

ફાગણના ફાગ ફાગણમાં જ હોય ને! એ વહી જાય એ પહેલાં આ નવયુવાન કવિનું તરોતાજા ગીત માણી લઈએ. એમની કલમ હંમેશા કશોક જુદો નવલો રંગ લઈને જ આવે છે…..

🙏🏻માફ કરશો મિત્રો, ‘કાવ્યવિશ્વ’માં કાવ્યસંગ્રહો લેવાના બંધ કર્યા છે. આભાર.🙏🏻