🔆મુકુન્દરાય પારાશર્ય ~ એક દિન🔆 -

*સૌથી મોટો પ્રશ્ન*

એક દિન મહેતાજીએ
છોકરાંને પ્રશ્ન કર્યો,
“ઈતિહાસ વિશે પ્રશ્ન
સૌથી કયો મોટો છે?’

યાદ કરી છોકરાઓ
પ્રશ્નનો વિચાર કરે,
મહેતાજીની આંગળીની
ચીંધ સહુ માથે ફરે.

કુરુક્ષેત્ર ! ટ્રોય તણો
ઇતિહાસ ખોટો છે.
ફેન્ચ રાજ્યક્રાન્તિ?
એવી ક્રાન્તિનોય જોટો છે.

રાજ્યમાં સુધારા?
ધારાફેરનો ક્યાં તોટો છે?
વીજળી કે સંચાશોધ?
એ તો પ્રશ્ન છોટો છે.

નોખાનોખા ધર્મ પંથ ?
અરે એમાં તો ગોટો છે.
સિપાઈના બળવાના
વાંસા પર સોટો છે.

સત્યાગ્રહ ? એમાં ય તે
કૈંકે મેલી દોટો છે,
આવડે ન તો ગાલે
મહેતાજીની થોંટો છે.

છેલ્લી બાંક, છેલ્લો રાંક
છોકરો જવાબ દે !
‘સાબ ! સાબ ! પ્રશ્ન
એક રોટલાનો મોટો છે.’

~ મુકુંદરાય પટ્ટણી ‘પારાશર્ય’ (13.2.1914-1945)

કેટલું સરળ અને તોયે કેટલું વેધક ! કેટલું સચોટ !

છબીલભાઈ ત્રિવેદી

13/02/2026 at 8:03 am

વાહ ખુબ સરસ રચના ખુબ ગમ્યુ

Kishor Barot

13/02/2026 at 9:59 am

ઉત્તમ

Saryu Parikh

13/02/2026 at 8:01 pm

પુજ્ય મુકુન્દભાઈની કવિતા વાંચી આનંદ થયો. મારા બા, ભાગીરથી અને મામા નાથાલાલ દવેના પરમ મિત્ર.
નોંધઃ તેમનું અવસાન વર્ષ ૧૯૮૫ છે. ભાવનગર.
સરયૂ પરીખ.

'સાજ' મેવાડા

13/02/2026 at 10:46 pm

હજી પણ સ્વતંત્ર દેશમાં આ પ્રશ્ન ઊઠે છે. કવિનું સંવેદનશીલ હ્રદય જ આવું કહીં શકે.

Umesh Upadhyay

14/02/2026 at 4:23 pm

સદાબહાર 👌👌

Kavyavishva

15/02/2026 at 9:00 pm

પ્રતિભાવ આપનારા સૌ મિત્રોનો ખૂબ ખૂબ આભાર.
‘કાવ્યવિશ્વ’ની મુલાકાત લેનારા મિત્રોનો પણ એટલો જ આભાર.
લતા હિરાણી

🔆મુકુન્દરાય પારાશર્ય ~ એક દિન🔆