🔆અખો ~ સમજણ વિના🔆 -

*સમજણ વિના રે*

સમજણ વિના રે સુખ નહિ સંતને રે;
વસ્તુગતિ કેમ કરી ઓળખાય?
આપમાં વસે છે આપનો આતમા રે,
તેણે કાંઈ જીવપણું નવ જાય.

રવિ રવિ કરતાં રે રજની નહિ મટે રે,
અંધારું તો ઊગ્યા પૂંઠે જાય;
રુદે રવિ ઊગે રે નિજ ગુરુજ્ઞાનનો રે,
થનાર હોય તે સહેજે થાય.

જળ જળ કરતાં રે તૃષ્ણા નવ ટળે રે,
ભોજન કહેતાં ન ભાંગે ભૂખ;
પ્રેમરસ પીતાં રે તૃષ્ણા તુરત ટળે રે,
એમ મહાજ્ઞાનીઓ બોલે છે મુખ.

પારસમણિ વિના રે જે પથરા મળે રે,
તેણે કાંઈ કાંચન લોહ ન થાય;
સમજણ વિના રે જે સાધન કરે રે,
તેણે કાંઈ જીવપણું નવ જાય.

દશ મણ અગ્નિ રે લખિયે કાગળે રે.
એને લઈ રૂમાં જો અલપાય;
એની અગ્નિથી રે રૂ નથી દાઝતું રે,
રતી એક સાચે પ્રલય જ થાય.

જીવપણું માટે રે અનહદ ચિંતવ્યે રે,
એ તો વાણીરહિત છે રે વિચાર;
જે જે નર સમજ્યા રે તે તો ત્યાં સમ્યા રે,
કહે અખો ઊતર્યા પેલે પાર.

~ અખો

આપને મારી આ હળવી વાત વાંચવી ગમશે. આભાર.

મજા આવી ગઈ!

છબીલભાઈ ત્રિવેદી

07/01/2026 at 9:38 am

વાહ ખુબ સરસ રચના પ્રણામ 🙏🙏🙏

વંદના બ્રહ્મભટ્ટ 'નેહ'
07/01/2026 at 9:56 am

કવિની કલમ સહજ શબ્દો થકી સુંદર આધ્યાત્મ જ્ઞાન પીરસે છે… વંદન છે 👌🙏

Loading...

લલિત ત્રિવેદી

07/01/2026 at 5:25 pm

પ્રણામ

Anonymous

07/01/2026 at 7:57 pm

પ્રતિભાવ આપનારા મિત્રોનો ખૂબ આભાર.
મુલાકાત લેનારા મિત્રોનો પણ ઘણો આભાર.
~ લતા હિરાણી

🔆અખો ~ સમજણ વિના🔆