રમણીક અગ્રાવત ~ અંતરિક્ષમાં લટકતી સીડીઓ (કાવ્યસંગ્રહ)

*વિજેતા*

જયજયકારથી ગાજતી હો દિશાઓ
તાળીઓ તાળીઓ તાળીઓ
પંડમાં સમાતું ન હોય પંડ
પોકારવું આગવું બંડ
કહી દેવું : આવજો.

ચોમેરથી આવતા હો હરખુડા હોંકારા
ખાળીને ઊછળતા ધક્ધક્ ધડકારા
વદી શકવું પોતાને, બસ થયું
ફંગોળવું કચકચાવીને
કંગાળ ખાલીપણું.

બને તો ઊભવું નહીં આવજોય કહેવા
ચાલી નીકળવું નીજ મગ્ન રહેવા
ચૂપચાપ ખસી જવું શૂન્યમાં
જાળવી લઈ જાતમાં
નરવું નવેલું હું-પણું.

~ રમણીક અગ્રાવત

‘પંડમાં સમાતું ન હોય પંડ’ વિજયના હરખની આનાથી સારી અભિવ્યક્તિ હોય શકે?

પણ…… ઉપર પહોંચેલાને ખસતાં ક્યાં આવડે છે? ઉદાહરણો ચારે બાજુ છલકાય છે.  

કોઈ વિરલા જ હોય જે આવજો કહેવાય ઊભા ન રહે અને ચૂપચાપ નીજની મસ્તીમાં સરી જાય !  

અંતરિક્ષમાં લટકતી સીડીઓ * રમણીક અગ્રાવત * ઊર્મિદીપ 2021

પુસ્તક મોકલવા બદલ આભાર કવિ